მოსამართლე გიორგი გრატიაშვილმა წინასწარი პატიმრობა შეუფარდა კახა კ.-ს. მას დედის მკვლელობის მცდელობაში ედება ბრალი.
შემთხვევა ბათუმში, წერეთლის ქუჩაზე, 28 სექტემბერს, ღამის თორმეტის ნახევარზე მოხდა. გამოძიების ვერსიით, ბრალდებულმა დედას ყელის და სახის არეში დანით სიცოცხლისთვის საშიში რამდენიმე ჭრილობა მიაყენა.
გამოძიება თავდაპირველად სისხლის სამართლის კიდექსის 11 პრიმა ერთი 117-ე მუხლით დაიწყო, რაც ოჯახის წევრის სხეულის მძიმე დაზიანებას გულისხმობს. მალევე პროკურატურამ საქმეს კვალიფიკაცია შეუცვალა და კახა კ.-ს 19-108-ე მუხლით გაასამართლებენ. ეს მკვლელობის მცდელობის მუხლია.
„ეს მუხლი სასჯელის სახით ითვალისწინებს 7-დან 15 წლამდე თავისუფლების აღკვეთას,“ – მიმართა მოსამართლემ ბრალდებულს.
მკვლელობის მცდელობის შემდეგ კახა კ. მიიმალა. რანდენიმე საათში იგი პოლიციელებმა დააკავეს. დაჭრილი ქალი კი, რეფერალურ ჰოსპიტალში გადაიყვანეს, სადაც იგი ამ დრომდე რჩება. მისი ჯანმრთელობის მდგომარეობა, ექიმების თქმით, სტაბილურია.
კახა კ. დედაზე ძალადობისთვის უკვე გასამართლებულია – დაახლოებით ერთი თვის წინ, 6 სექტემბერს, მას საპროცესო შეთანხმება გაუფორმა პროკურატურამ. დედაზე ფიზიკური ძალადობისთვის ბრალდებულს სასამართლომ პირობითი მსჯავრი შეუფარდა და პატიმრობიდან გაათავისუფლა.
დედის მკვლელობის მცდელობა, გამოძიების ვერსიით, კახა კ.-მ პირობითი მსჯავრის ქვეშ ჩაიდინა. ის 22 წლისაა.
„ვნანობ ჩემს საქციელს, გამიგეთ?“ – უთხრა მოსამართლეს ბრალდებულმა. მას ამ ეტაპზე ადვოკატი არ ჰყავს.
მოსამართლის დუმილის შემდეგ ბრალდებულმა განაგრძო:
„რომ ამბობთ, მიიმალაო, ასეა, ვეთანხმები, მაგრამ მე ხომ საზღვარი არ გადამიკვეთავს? მე დანაშაულის ადგილიდან გავიქეცი…“ – თქვა მან.
მოსამართლემ ბრალდებულს ჰკითხა, ხომ არ აქვს მას გირაოს, ან თავდების შეთავაზება.
„არა. ჰოდა, ახლა რა უნდა ვქნა?“ – იკითხა ბრალდებულმა.
„თქვენ პირობითი მსჯავრის ქვეშ იმყოფებოდით… ისევ მაღალია დანაშაულებრივი საქმიანობის გაგრძელების საფრთხე,“ – დაასრულა მოსამართლემ წინასწარი პატიმრობის შეფარდების განმარტება და დარბაზიდან გავიდა.
