მთავარი,სიახლეები

სასჯელი არასრულწლოვან გოგოსთან სექსისთვის

30.09.2018 • 5181
სასჯელი არასრულწლოვან გოგოსთან სექსისთვის

არასრულწლოვანთან სექსუალური კავშირისთვის ბოლო ერთი წლის განმავლობაში ხელვაჩაურის რაიონულ სასამართლოს ორი განაჩენი მიუღია. ორივე შემთხვევაში გამოძიება მიუთითებს, რომ სექსუალური კავშირი „ნებაყოფლობითი“ იყო და ოჯახი შეიქმნა. პროკურატურამ ორივე ბრალდებულს საპროცესო შეთანხმება გაუფორმა, სასამართლომ კი გასამართლებულებს დამატებით სასჯელად საზოგადოებისთვის სასარგებლო შრომა მიუსაჯა.

არასრულწლოვანთან სექსუალური კავშირისთვის ხელვაჩაურის სასამართლომ ხულოში მცხოვრები რ.დ. გაასამართლა. მას 4 წლით თავისუფლების აღკვეთა შეუფარდა მოსამართლე ნუგზარ მგელაძემ, თუმცა პროკურატურასთან დადებული საპროცესო შეთანხმებით, სასჯელი რ.დ.-ს პირობით ჩაეთვალა.

დამატებითი სასჯელის სახით რ.დ.-ს 80 საათი საზოგადოებისთვის სასარგებლო შრომა მიუსაჯეს. რ.დ. სრულწლოვანია.

განაჩენის მიხედვით, რ.დ.-მ „დაამყარა ნებაყოფლობითი სექსუალური ხასიათის შეღწევა“ 16 წელს მიუღწეველ გოგოსთან, რომელიც შემდეგ მისი ცოლი გახდა.

რ.დ.-სთვის პროკურატურას ბრალი სისხლის სამართლის კოდექსის 11 პრიმა ერთი 140-ე მუხლის შესაბამისად ჰქონდა წარდგენილი, რაც გულისხმობს პასუხისმგებლობას ოჯახური დანაშაულისთვის, სრულწლოვანის სექსუალური ხასიათის შეღწევას დამნაშავისთვის წინასწარი შეცნობით 16 წლის ასაკს მიუღწევლის სხეულში. ეს დანაშაული 7-დან 9 წლამდე თავისუფლების აღკვეთას ითვალისწინებს.

გადაწყვეტილების მიღების შემდეგ, მოსამართლე ნუგზარ მგელაძემ საქმეში დატოვა არასრულწლოვანთან ქორწილის ამსახველი ფოტოები და ვიდეოჩანაწერები.

„საქმეზე ნივთიერ მტკიცებულებად ცნობილი სამი ცალი ვიდეოდისკი [ქორწინების ვიდეოჩანაწერი, ქორწინების ფოტომასალა] დარჩეს საქმეში სისხლის სამართლის საქმის შენახვის ვადით,“ – აღნიშნულია განაჩენში, რომელიც მოსამართლემ 31 ივლისს მიიღო.

არასრულწლოვანთან სექსუალური კავშირისთვის ხელვაჩაურის სასამართლოს გასულ წელსაც გაუსამართლებია ერთი პირი – ქედაში მცხოვრები ნ.მ. მას 16 წელს მიუღწეველ გოგოსთან სექსი 2015 წელს ჰქონდა, ხოლო ბრალი 2017 წელს წაუყენეს, მაშინ, როცა ოჯახს შვილი გაუჩნდა და დაბადების მოწმობის აღება გახდა საჭირო.

ამ საქმეში ბათუმის სამშობიარო სახლის ჩანაწერსაც ნახავთ, რომლის მიხედვითაც ახალშობილი დედა ისევ არასრულწლოვანია.

ეს საქმეც პროკურატურასთან საპროცესო გარიგებით დასრულდა. აქაც ბრალის აღწერისას ნახავთ ფრაზას „ნებაყოფლობითი სექსუალური კავშირი“.

ნ.მ.-ს მოსამართლე ხვიჩა კიკილაშვილმა სამი წლით თავისუფლების აღკვეთა მიუსაჯა, რაც პირობით ჩაეთვალა. პირობითი მსჯავრის მოხდის პარალელურად, მსჯავრდებულს დაკისრებული აქვს საზოგადოებისთვის სასარგებლო შრომა – 100 საათის ოდენობით.

გადაბეჭდვის წესი


ასევე: