მდიდრები ავტომობილებზე ქონების გადასახადს წელს პირველად იხდიან – ბოლო ვადა 15 ნოემბერია


ფიზიკური პირი, თუ მისი [ან მისი ოჯახის] შემოსავალმა 2017 წელს გადააჭარბა 40 000 ლარს, ვალდებულია 2018 წლის 2 ნოემბრამდე, შემოსავლების სამსახურს წარუდგინოს „ფიზიკური პირის ქონების გადასახადის წლიური დეკლარაცია“.

შემოსავლების სამსახურის ინფორმაციით, 2018 წლის ქონების დეკლარაციაში, დასაბეგრ ობიექტებში [საკუთრებაში არსებული უძრავი ქონება, მათ შორის, დაუმთავრებელი მშენებლობა ან მათი ნაწილი, იახტა [კატარღა], შვეულმფრენი, თვითმფრინავი] ასევე შეიტანება საგარეო-ეკონომიკური საქმიანობის ეროვნული სასაქონლო ნომენკლატურის 8703 კოდით განსაზღვრული მსუბუქი ავტომობილები.

დეკლარაციაში ავტომობილების შეტანა, საკანონმდებლო ცვლილებების შემდეგ, წელს პირველად ხდება.

„საქართველოს საგადასახადო კოდექსით“ ფიზიკური პირის დასაბეგრ ქონებაზე გადასახადის წლიური განაკვეთი დიფერენცირებულია გადასახადის გადამხდელის ოჯახის მიერ საგადასახადო წლის განმავლობაში მიღებული შემოსავლების მიხედვით და განისაზღვრება შემდეგი ოდენობით:

  • 100 000 ლარამდე შემოსავლის მქონე ოჯახებისთვის – საგადასახადო პერიოდის ბოლოსთვის დასაბეგრი ქონების [ამ შემთხვევაში მსუბუქი ავტომობილის] საბაზრო ღირებულების არანაკლებ 0,05 პროცენტისა და არა უმეტეს 0,2 პროცენტისა;
  • 100 000 ლარის ან მეტი შემოსავლის მქონე ოჯახებისთვის – საგადასახადო პერიოდის ბოლოსთვის დასაბეგრი ქონების [მათ შორის ავტომობილის] საბაზრო ღირებულების არანაკლებ 0,8 პროცენტისა და არა უმეტეს 1 პროცენტისა.

შემოსავლების სამსახურის განცხადებით, ფიზიკური პირის ქონების დეკლარაცია შემოსავლების სამსახურს წარედგინება ელექტრონული ფორმით [https://eservices.rs.ge/Login.aspx]

დეკლარაციაში მონაცემები დასაბეგრი ქონების შესახებ შეიტანება გასული საგადასახადო წლის [ამ შემთხვევაში 2017 წლის] მიხედვით, ხოლო დასაბეგრი მიწის შესახებ – მიმდინარე საგადასახადო წლის მიხედვით.

გადასახადის გადამხდელი ვალდებულია გადასახადი გადაიხადოს 2018 წლის 15 ნოემბრის ჩათვლით.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com