Batumelebi | WWF საქართველო: ზუთხისებრთა რაოდენობა კრიტიკულად შემცირებულია WWF საქართველო: ზუთხისებრთა რაოდენობა კრიტიკულად შემცირებულია – Batumelebi
RU | GE  

WWF საქართველო: ზუთხისებრთა რაოდენობა კრიტიკულად შემცირებულია

WWF (World Wide Fund for Nature) საქართველო ინფორმაციას ავრცელებს, რომ ზუთხისებრთა რაოდენობა კრიტიკულად შემცირებულია. ზუთხისებრთა პოპულაციის შემცირების ძირითად მიზეზად ორგანიზაცია წყალსაცავებისა და კაშხლების მშენებლობას, მდინარეთა რეგულირებას, ჰაბიტატების ფრაგმენტაციას, სატოფო (საქვირითე) ადგილების განადგურებასა და ბრაკონიერობას მიიჩნევს.

“ისტორიულად, ზუთხისებრნი ქვირითობდნენ მდინარე რიონში, ენგურსა და ცხენისწყალში. მდინარე ენგურის 35 კმ-იანი და მდინარე ცხენისწყლის 32 კმ-იანი საქვირითე მონაკვეთები განადგურდა წყალსაცავებისა და კაშხლების მშენებლობის გამო. ამჟამად ზუთხისებრთა გამრავლება მხოლოდ მდინარე რიონში ხდება,” – წერს WWF საქართველო.

11 სექტემბერს WWF კავკასიის წარმომადგენლობის ორგანიზებით, მდინარე რიონზე ჩატარდა ზუთხისებრთა შესწავლისა და მონიტორინგისთვის ახალი ინტეგრირებული მეთოდოლოგიის საცდელი კვლევა. ორგანიზაციის განმარტებით, ინტეგრირებული მეთოდოლოგია მოიცავს ხმოვანი ტელემეტრიისა და მაღალი რეზოლუციის ულტრაბგერითი ჰიდროლოკატორით სკანირების მეთოდებს.

კვლევა ჩატარდა ამერიკელი და კანადელი მეცნიერების ხელმძღვანელობით, ქართველი ექსპერტების ჩართულობითა და საქართველოს გარემოს დაცვისა და სოფლის მეურნეობის სამინისტროს აქტიური მხარდაჭერით.

საცდელი კვლევის შედეგებმა აჩვენა, რომ შესაძლებელია აღნიშნული ინტეგრირებული მეთოდოლოგიის გამოყენება მდინარე რიონში და შავ ზღვაში ზუთხისებრთა კვლევისა და მონიტორინგისთვის. ასევე, ულტრაბგერითი ჰიდროლოკატორით სკანირების მეთოდის დახმარებით დაფიქსირდა მდინარე რიონში ქვირითობისთვის შესული ზუთხისებრთა ინდივიდები, რაც კიდევ ერთხელ ადასტურებს ზუთხისებრთა გადარჩენისთვის მდინარე რიონის განსაკუთრებულ მნიშვნელობას.

 

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან