„თავს სრულად დამნაშავედ მივიჩნევ,“ – მიმართა მოსამართლე ლევან გელოვანს ბრალდებულმა. პროკურატურა ომარ ჯ-ს არარეგისტრირებულ ქორწინებაში მყოფ ცოლზე ძალადობას ედავება არასრულწლოვანი შვილის თანდასწრებით.
ბრალდებული ერთ-ერთი რეგიონიდანაა. ის ცოლს ბათუმში ეჩხუბა, ნათესავის ოჯახში სტუმრად ყოფნის დროს. გამოძიების ვერსიით, ომარმა სუფრასთან ცოლს სახეში რამდენჯერმე გაარტყა ხელი, რითაც ქალს ფიზიკური ტკივილი მიადგა. პოლიციას ძალადობის თვითმხილველმა მასპინძლებმა დაურეკეს.
განსხვავებული ვერსია აქვთ ბრალდებულის ახლობლებს. ისინი შემთხვევას არ შესწრებიან, თუმცა სჯერათ, რომ „დამნაშავე ქალი იქნება“.
„უმიზეზოდ არ დაარტყამდა ჩემი შვილი ქალს, თანაც როგორ უყვარდა… კარგად გაზრდილი შვილი მყავს მე,“ – გვითხრა ბრალდებულის დედამ. მისი თქმით, ამას ის ადასტურებს, რომ ქალი შემთხვევის შემდეგ გაუჩინარდა.
„ვეღარ ნახულობს ვერავინ, მისცა ჩვენება გამომძიებლებს და წავიდა… თუ მართალი იყო, რატომ დაიკარგა?“ – კითხულობს ბრალდებულის დედა.
დაზარალებული ქალის ჩვენება რომ მნიშვნელოვანია, ამას ბრალდებულის ადვოკატი – ბიძინა ბერიძეც ამბობს. ის სახელმწიფო იურიდიული დახმარების სამსახურის იურისტია. ადვოკატი განმარტავს, რომ ოჯახში ძალადობის საქმეზე პროკურატურა, ბრალის აღიარების მიუხედავად, საპროცესო შეთანხმებას აღარ აფორმებს, მოსამართლე კი, მხოლოდ პირობით მსჯავრს ბრალდებულს ვერ შეუფარდეს, თუკი დაზარალებული პატიების მომხრე არ არის.
დაზარალებული ქალის პოზიცია ამ დროისთვის უცნობია.
მოსამართლე ლევან გელოვანმა ბრალდებულს უთხრა, რომ ბრალის დადასტურების შემთხვევაში მას საზოგადოებისთვის სასარგებლო შრომა 200-დან 400 საათამდე, ან ერთიდან სამ წლამდე თავისუფლების აღკვეთა ელის. ომარ ჯ. წინასწარ პატიმრობაშია.
ბრალის სრულად აღიარების მიუხედავად, დაცვის მხარემ სადავოდ მიიჩნია ყველა მტკიცებულება, რაც ამ საქმეზე პროკურატურამ წარმოადგინა. ასეთ შემთხვევაში, მოსამართლემ ყველა მოწმის ჩვენება უნდა მოისმინოს.
„თქვენი აზრით, როგორ უნდა დაისაჯოს ომარ ჯ. თუ დადასტურდება, რომ ის დამნაშავეა?“ – ვკითხეთ ბრალდებულის დედას სასამართლო პროცესის დასრულების შემდეგ.
„არ უნდა დაისაჯოს საერთოდ,“ – გვითხრა ბრალდებულის დედამ. -„მისი გაჭირვება ეყოფა მაგას. ოჯახი დაანგრევია მაგან ჩემს შვილს და ისე გაყვა, საერთო შვილიც არ ჰყავთ. ეტყობა, გააღიზიანა რაღაცაზე და ეს იყო, არ ვიცი“.
