Batumelebi | ბათუმის ბოტანიკური ბაღის შემოსავალი 63 პროცენტით გაიზარდა ბათუმის ბოტანიკური ბაღის შემოსავალი 63 პროცენტით გაიზარდა – Batumelebi
RU | GE  

ბათუმის ბოტანიკური ბაღის შემოსავალი 63 პროცენტით გაიზარდა

ბათუმის ბოტანიკური ბაღის ინფორმაციით, ვიზიტორთა რაოდენობა გასულ წელთან შედარებით 10 პროცენტით გაიზარდა, ბაღის შემოსავალი კი – 63 პროცენტით. ბოტანიკური ბაღის შემოსავლების ზრდა უცხო ქვეყნის მოქალაქეებისათვის ბილეთის ფასის ზრდამ განაპირობა – 2018 წლიდან უცხო ქვეყნის მოქალაქეებისთვის ბოტანიკური ბაღის ბილეთი 15 ლარია.

2018 წლის პირველი იანვრიდან 31 ივლისამდე, გასული წლის იმავე პერიოდთან შედარებით, 63 პროცენტით გაიზარდა ბოტანიკური ბაღის საერთო შემოსავალი,  უშუალოდ  ვიზიტორთა საერთო რაოდენობიდან მიღებული შემოსავალი კი – 83 პროცენტით.

  • 2018 წელს ბოტანიკური ბაღის საერთო შემოსავალი 2 300 633 ლარია [იანვრიდან ივლისის ჩათვლით]
  • 2017 წელს ბოტანიკური ბაღის საერთო შემოსავალი 1 404 476 ლარი იყო [იანვრიდან ივლისის ჩათვლით]

უცხოელი ტურისტებისთვის ბოტანიკური  ბაღი ფასს ეტაპობრივად ზრდის. ეს ტენდენცია 2011 წელს დაიწყო, როცა ბოტანიკური ბაღის დათვალიერების საფასური საქართველოს მოქალაქეებისათვის – 3 ლარით, სხვა ქვეყნის მოქალაქეებისათვის – 8 ლარით განისაზღვრა. 2015 წელს ბოტანიკურ ბაღში შესვლის საფასური საქართველოს მოქალაქეებისთვისაც 8 ლარი გახდა, ხოლო 2018 წლის თებერვალში უცხოელის ტურისტებისთვის ბოტანიკური ბაღის დათვალიერების საფასური 15 ლარით განისაზღვრა. მაშინ ბოტანიკური ბაღის ადმინისტრაციაში ფასის ზრდის ერთ-ერთ მთავარ არგუმენტად უცხოეთში არსებული მსგავსი პრაქტიკა დაასახელეს. 

ბოტანიკურ ბაღში ახლა ამბობენ, რომ ბილეთის ფასის ზრდა აღარ იგეგმება.

რაც შეეხება ვიზიტორთა სტატისტიკას, „ბოტანიკური ბაღის“ მიერ მოწოდებული ინფორმაციის თანახმად, 2018 წელს, პირველი იანვრიდან პირველი 31 ივლისის ჩათვლით, ბოტანიკური ბაღი 154 193-მა ადამიანმა დაათვალიერა.

2018 წელს 154 193 ვიზიტორიდან უმრავლესობა – 107 439, უცხო ქვეყნის მოქალაქე იყო [საანგარიშო პერიოდი].

იგივე ტენდენცია იყო გასულ წელსაც, 2017 წელს 140 067 ვიზიტორიდან 124 946 უცხო ქვეყნის მოქალაქე იყო.

უცხოელი ვიზიტორების სტატისტიკის თანახმად კი, გასულ წელს ბათუმის ბოტანიკურ ბაღს ყველაზე მეტი დამთვალიერებელი რუსეთიდან ჰყავდა. სტატისტიკა ასე ნაწილდება:

  • რუსეთი – 113 511 ვიზიტორი
  • თურქეთი – 34 262 ვიზიტორი
  • ირანი – 26 719 ვიზიტორი
  • ისრაელი – 16 996 ვიზიტორი
  • საუდის არაბეთი – 11 240 ვიზიტორი

„ბათუმის ბოტანიკური ბაღი“ ბათუმის მერიის ა(ა)იპ -ია. ეს ადგილი ერთ-ერთი ყველაზე პოპულარული ღირსშესანიშნაობაა აჭარაში ჩამოსული ტურისტებისთვის.

_______________

მთავარი ფოტო ბათუმის ბოტანიკური ბაღის ვებგვერდიდან

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com