ზღვისპირა სანაპირო ზოლში სასწრაფო სამედიცინო დახმარების ბრიგადების მორიგეობა დღეიდან დაიწყება, ამის შესახებ ინფორმაციას აჭარის ჯანდაცვის სამინისტრო ავრცელებს. სამედიცინო დახმარების ბრიგადების მორიგეობა ტურისტული სეზონის დადგომას უკავშირდება.
„ბათუმში სასწრაფო სამედიცინო დახმარების ბრიგადა დემეტრე თავდადებულის ქუჩის დასაწყისში, სამაშველო სამსახურის მედპუნქტის მიმდებარე ტერიტორიაზე განთავსდა და, საჭიროების შემთხვევაში, ზღვისპირა პარკის დამსვენებლებს პირველად დახმარებას ყოველდღიურად 10:00 საათიდან 22:00 საათამდე გაუწევს“.
სადღეღამისო მორიგეობა დაწესდება გონიო-კვარიათის ადმინისტრაციულ ერთეულშიც, სადაც სასწრაფო სამედიცინო ბრიგადა 24-საათიან რეჟიმში იმუშავებს.
სასწრაფო სამედიცინო დახმარების ბრიგადები ასევე განთავსდება მახინჯაურისა და ხელვაჩაურის ტერიტორიებზეც.
„ამ დროისთვის ქალაქს სულ 16 ბრიგადა ემსახურება“.
აღნიშნული მომსახურება ზღვის საკურორტო სეზონის დასრულებამდე გაგრძელდება.
