ქობულეთის ერთ-ერთ საჯარო სკოლაში მესამეკლასელი ბავშვის მობილურზე უცხო ზარი 21 მარტს განხორციელდა. არასრულწლოვნის მშობელმა უცხო ზართან დაკავშირებით გამოძიებას მიმართა, რადგან მშობლის თქმით, შესაძლოა ამ ზარს კავშირი ჰქონოდა საშიშ ინტერნეტთამაშ „ლურჯ ვეშაპთან“.
დღეს, 24 მაისს, შს სამინისტროში „ბათუმელებს“ უთხრეს, რომ უცხო ზარი არასრულწლოვანი გოგონას მობილურზე შემთხვევით განხორციელდა და „ლურჯ ვეშაპს“ არ უკავშირდება.
„გამოძიების მსვლელობისას გამოიკითხა ზარის ავტორიც, არასრულწლოვანი ოჯახის წევრებიც და გამოძიებამ დაადგინა, რომ ადგილი ჰქონდა შემთხვევითობას. რადგან არც გოგონამ და არც დედამ რუსული არ იციან, ჩათვალეს, რომ ეს იყო „ლურჯ ვეშაპთან“ დაკავშირებული ზარი“, – გვითხრეს შსს-ს პრესსამსახურში.
მათივე ინფორმაციით, საქმეს დანაშაულთან ბრძოლის სამმართველო იძიებდა.
„ზარი თბილისიდან განხორციელდა. ზარის ავტორი ამბობდა, რომ თავის შვილს ურეკავდა. ტელეფონის ნომერი, სადაც ზარის ავტორს უნდა დაერეკა, ერთი ციფრით განსხვავდებოდა მესამეკლასელი გოგონას მობილურის ნომრისგან. ამის მიუხედავად, გამოძიება დეტალებზე მუშაობას მაინც აგრძელებს“, – თქვეს შსს-ში.
