დღეს, 20 აპრილს, ბათუმის საკრებულოს სხდომაზე „ერთიანი ნაციონალური მოძრაობის“ წევრები ქალაქის მერის, ლაშა კომახიძის დასწრებას მოითხოვდნენ. „მერი მოგვენატრა“ – განაცხადა ოპოზიციამ და შესვენების გამოცხადება და ლაშა კომახიძის სხდომაზე დასწრება ითხოვა.
ბათუმის საკრებულოს ოპოზიციის განცხადებით, მათ ლაშა კომახიძესთან ბიუჯეტთან დაკავშირებული კითხვები აქვთ, რადგან საკრებულოზე საკითხის მომხსენებელი არჩილ ვანაძე პოლიტიკოსი არ არის და პოლიტიკურ კითხვებს ვერ უპასუხებს.
შესვენება გამოცხადდა, თუმცა არც ქალაქის მერი და არც ვიცე-მერი სხდომაზე არ გამოჩენილან. საკრებულოში განმარტეს, რომ მერი და ვიცე-მერიც დაკავებულნი არიან და სხდომაზე დასწრებას ვერ შეძლებენ.
ამ განმარტებამ „ერთიანი ნაციონალური მოძრაობის“ წევრების პროტესტი გამოიწვია. „ეს ძალიან მნიშვნელოვანი დოკუმენტია და მერს არ სცალია, მაშინ როცა მიიცალა სადღობელაშვილთან და პრორუსულ ძალასთან შესახვედრად…“ – განაცხადა მირდატ ქამადაძემ. ოპოზიციამ საკითხის გადადება მოითხოვა, თუმცა საკრებულოს უმრავლესობამ ეს წინადადება არ გაიზიარა, ამიტომაც ენმ-ის წევრებმა პროტესტის ნიშნად სხდომა დატოვეს.
ბათუმის საკრებულოს თავმჯდომარე მიიჩნევს, რომ ოპოზიციას „მწვავე კითხვები არ ჰქონდა“ და ეს გახდა სხდომის დატოვების მიზეზი.
სხდომა ბათუმის საკრებულოში
