თანამდებობის პირი, რომლის ხელფასი შარშან კიდევ უფრო გაიზარდა და თვეში 28 475 ლარია


საქართველოს სახელმწიფო ელექტროსისტემის მმართველთა საბჭოს თავმჯდომარის, სულხან ზუმბურიძის შემოსავლები 15 ათასი ლარით გაიზარდა 2017 წელს და 341 700 ლარს მიაღწია. ამის შესახებ სულხან ზუმბურიძეს თავის ბოლო ქონებრივ დეკლარაციაში უწერია, რომელიც მიმდინარე წლის 31 მარტს აქვს შევსებული.

ამ დეკლარაციის მიხედვით, სულხან ზუმბურიძის შემოსავლები 15 097 ლარით, 2016 წელთან შედარებით, გაიზარდა. შესაბამისად, გასული წელს მისი შემოსავლები ყოველთვიურად 28 475 ლარი იყო.

სულხან ზუმბურიძემ, როგორც საქართველოს სახელმწიფო ელექტროსისტემის მმართველთა საბჭოს თავმჯდომარემ, 2016 წლის განმავლობაში 326 603 ლარი მიიღო შემოსავლის სახით.

სულხან ზუმბურიძის მეუღლის, ქეთი რეხვიაშვილის შემოსავალი კი გასულ წელს 92 848 ლარი ყოფილა. შესაბამისად, მისი შემოსავალი თვეში 7 737 ლარია. ქეთი რეხვიაშვილი ამ პერიოდში საქართველოს კომუნიკაციების ეროვნულ კომისიაში მთავარი სპეციალისტის პოზიციაზე მუშაობდა.

სულხან ზუმბურიძის 2017 წლის ქონებრივი დკლარაციის მიხედვით, მისი და მისი მეუღლის წლიური შემოსავალი 419 451 ლარია.

მთავარი ფოტო: საქართველოს სახელმწიფო ელექტროსისტემა

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან