მთავარი,სიახლეები

ლიფტი დენს გვარტყამს – რატომ ჩაიბარა მთავრობამ ლიფტები დამიწების გარეშე

19.02.2018 • 3584
ლიფტი დენს გვარტყამს – რატომ ჩაიბარა მთავრობამ ლიფტები დამიწების გარეშე

ბათუმში, ხიმშიაშვილის ქუჩის პირველ ნომერში მცხოვრები მოქალაქეები ამბობენ, რომ  მათი კორპუსის  ლიფტის კაბინა ზოგჯერ დენს ატარებს. ოჯახებს სპეციალისტმა უთხრა, რომ ოცივე ლიფტი, რომელიც ამ კორპუსშია, დამიწების გარეშე მუშაობს.

ნანა ვარშანიძე: დენის დარტყმის გამო ცუდად არავინ გამხდარა და სასწრაფოც არ გამოგვიძახებია, მაგრამ ხშირად ატარებს დენს ლიფტის კაბინა…

ლევან ბეშიტაიშვილი: 2015 წელს ჩაიბარეს ეს კორპუსი. თავიდანვე იყო პრობლემა. მამაჩემი ჩადიოდა ერთხელ და ისე სწრაფად წავიდა, რომ კინაღამ დაანარცხა პირველ სართულზე. ხშირად ფუჭდება და საერთოდ ჩერდება. ლიფტის ხელოსანმა გვითხრა, რომ დამიწება არ აქვს არც ერთ ლიფტს. ჩვენს სადარბაზოში უკვე გავაკეთეთ დამიწება და ამაში 380 ლარი გადავიხადეთ. ახლა დამიწება ყველა სართულზე, ლიფტის კართანაა გასაკეთებელი. მთლიანად 1180 ლარია საჭირო“.

ბათუმის მერიამ ხიმშიაშვილის ქუჩის პირველ ნომერში „გუმბათი ჯგუფის“ მიერ აშენებული კორპუსი 2015 წლის თებერვალში ჩაიბარა. ჩაბარება მოიცავდა ლიფტების ტექნიკური გამართულობის შემოწმებასაც.

„ჩვენ არ ვამოწმებდით ამ კუთხით ლიფტებს. ამას ეკონომიკის სამინისტრო აკეთებს,“ – გვითხრა ზაალ მამუჭაძემ, ბათუმის მერიის ზედამხედველობის სამსახურის უფროსმა. მისი თქმით, ეკონომიკის სამინისტროს შესაბამისი სამსახურის დასკვნის საფუძველზე ჩაიბარა მერიამ ბინა.

„დენი არტყამს რას ნიშნავს. მასე მანქანიდან როცა ჩამოვდივარ, მეც მარტყამს დენი. ვინმე ცუდად გახდა, საავადმყოფოში გადაიყვანეს? პრეტენზია ქაღალდზე დაწერილი ვიცი,“ – აღნიშნა დავით ბერიძემ, აჭარის ფინანსთა და ეკონომიკის სამინისტროს ტექნიკური ზედამხედველობის განყოფილების უფროსმა. 2017 წლის იანვრამდე ეს უწყება დებდა დასკვნას ახალ კორპუსებში ლიფტების ტექნიკურ გამართულობაზე, თუმცა დავით ბერიძის თქმით, პრაქტიკულად არც ეს უწყება ამოწმებდა.

„ჩვენ დამიწებას არ ვამოწმებდით, მაგრამ ვითხოვდით დოკუმენტს, იყო თუ არა დამიწებული ლიფტი. ამ დოკუმენტის გარეშე დასკვნას არ გავცემდით. ბინის მფლობელს უნდა წარმოედგინა დოკუმენტი,“ – განმარტავს დავით ბერიძე.

2017 წლიდან კორპუსებში ლიფტების ტექნიკურ გამართულობას აკრედიტებული საინსპექციო ორგანოები ამოწმებენ. ამ ორგანოს ახალი კორპუსის მშენებელი კომპანია ქირაობს. ბაზარზე ამ დროისთვის სულ ორი აკრედიტებული ორგანოა, რომელსაც შეუძლია დასკვნის დადება ლიფტების ტექნიკურ გამართულობაზე.

სად შეიძლება ვნახოთ დოკუმენტი ხიმშიაშვილის პირველში მდებარე კორპუსში ლიფტების დამიწების შესახებ? – ეკონომიკის სამინისტროს წარმომადგენელმა გვიპასუხა, რომ დოკუმენტი ლიფტის დამიწების შესახებ სამინისტროში არ ინახება და მისი შენახვის ვალდებულება სამინისტროს არ აქვს. „ასე ყველა დოკუმენტი რომ შევინახოთ, ერთი არქივი ცალკე დასჭირდება. კანონი არ გვავალებს შენახვას. ამხანაგობამ უნდა გაარკვიოს, სად წავიდა დოკუმენტი დამიწების შესახებ,“ – გვითხრა მან.

„დოკუმენტი ლიფტების დამიწების შესახებ ფორმალურად არსებობს,“ – აღნიშნავს ხიმშიაშვილის პირველში მცხოვრები რამდენიმე მოქალაქის ინტერესების დამცველი, ლინდა შალამბერიძე. ამ კორპუსში მცხოვრებთ ქონებრივი დავა აქვთ სასამართლოში ბათუმის მერიის და მშენებელი კომპანიის წინააღმდეგ. დავის ნაწილია ლიფტების ტექნიკური გაუმართაობაც.

„ფორმალურად წერია, რომ დამიწებაზე შემოწმებულია ლიფტები, მაგრამ ფაქტია, რომ იგი არ არსებობს. დამიწება გაკეთებული რომ ყოფილიყო, ხელოსანი  ხელახლა ხომ არ გააკეთებდა? ჩვენი ინფორმაციით, არათუ ამ კორპუსში, არამედ ახალაშენებული კორპუსების უმრავლესობაში ლიფტები დამიწებული არ არის. ჩვენ ვთხოვეთ დასკვნის დადება სამხარაულის ექსპერტიზის ეროვნულ ბიუროს, მაგრამ უარი მივიღეთ. მოგვწერეს, რომ არ ჰყავთ ექსპერტი, რომელიც ლიფტებს დამიწებაზე შეამოწმებდა,“ – გვითხრა ლინდა შალამბერიძემ.

„დამიწება არ იყო, მაგრამ არა მგონია, განსაკუთრებული ხდებოდეს რამე ამ კორპუსში. თითქმის ყველგან ასეა ახალ კორპუსებში… უფრო ლიფტისთვის არის საფრთხე, ვიდრე ადამიანებისთვის, როცა დამიწება არ არის გაკეთებული. შესაძლოა, დამიწების გარეშე ლიფტი ნებისმიერ დროს გაჩერდეს“, – გვითხრა ლიფტების ხელოსანმა, რომელმაც ვინაობის გამხელა არ ისურვა.

„ამ მოქალაქეებმა პრეტენზია უნდა გამოხატონ იმ კომპანიის მიმართ, რომელიც ლიფტების გამართულად მუშაობაზეა პასუხისმგებელი. ჩვენ არცერთ თეთრს არ ვიღებთ ამაში,“ – გვითხრა კომპანია „გუმბათი ჯგუფის“ დირექტორის მოადგილემ, ლაშა ბალაძემ. ამბობს, რომ კორპუსი ეკონომიკის სამინისტროს კომპანიამ კი არა, იმ ფიზიკურმა პირმა ჩააბარა, რომელმაც „გუმბათი ჯგუფს“ მშენებლობა დაუკვეთა.

„ჩვენ ყველა დოკუმენტები გადავეცით ამ მოქალაქეს, მათ შორის, იქნებოდა დოკუმენტი დამიწებაზე, ზუტად არ მახსოვს,“ – გვითხრა ლაშა ბალაძემ.

 

ხიმშიაშვილის პირველში 468 ოჯახი ცხოვრობს.  მათ უმრავლესობას სხვადასხვა დროს, ექსპროპრიაციის წესი შეეხო და კერძო სახლები დათმეს. აქ ბინებს ფლობს ბათუმის მერიაც.

 

 

გადაბეჭდვის წესი


ასევე: