რატომ ვერ იწყებს ბათუმის მერია 99 ლიფტის შეცვლას – დავა 8 მილიონისთვის

ბათუმის მერიის სამმართველოს ჯერ 59, ამჯერად კი 99 ლიფტის შესაცვლელად გამოცხადებულ ტენდერში უჩივიან. საჩივრებისა და დავების საბჭოს მიერ მიღებული გადაწყვეტილებების გამო 59 ლიფტის შეცვლაზე ტენდერები [5 მილიონი ლარით] გასული წლის სექტემბრიდან დღემდე ვერ შედგა – ეს ტენდერები სამმართველომ შეწყვიტა.

მოგვიანებით მერიის საქალაქო ინფრასტრუქტურისა და კეთილმოწყობის სამმართველომ 59 ლიფტს 40 დაამატა და უკვე 99 ლიფტის შეცვლაზე ხელახალი ტენდერი 8 მილიონი ლარით გამოაცხადა.

შპს „თბილლიფტსერვისმა“ ამ ახალი ტენდერის გამო სამმართველოს დავების საბჭოში ორჯერ უჩივლა. კომპანიის ორივე საჩივარი საბჭომ ნაწილობრივ დააკმაყოფილა.

კომპანიამ პირველი საჩივრით ტენდერის ერთ-ერთი მოთხოვნა გაასაჩივრა.

საჩივრის მიხედვით, მერიის სამმართველომ 8-მილიონიან ტენდერში „შეცვალა პრეტენდენტისადმი წინა შეწყვეტილი ტენდერებით დადგენილი მოთხოვნები გამოცდილების შესახებ“, ამიტომ, „თბილლიფტსერვისმა“ მოითხოვა, რომ სატენდერო კომისიამ „გააუქმოს მოთხოვნა პრეტენდენტის გამოცდილებასთან დაკავშირებით, ჩამოაყალიბოს სატენდერო დოკუმენტაციის ახალი რედაქცია და უზრუნველყოს მისი შესაბამისობა ლიფტების უსაფრთხო ექსპლუატაციის შესახებ ტექნიკური რეგლამენტის მოთხოვნებთან.“

დავების საბჭომ მერიის სამმართველოს სატენდერო კომისიას დაავალა მიღებული გადაწყვეტილების გადასინჯვა და „სახელმწიფო შესყიდვის განხორციელება სახელმწიფო შესყიდვების მარეგულირებელი კანონმდებლობის მოთხოვნათა სრული დაცვით.“

ამის შემდეგ, სატენდერო კომისიამ გამოსცა ახალი ოქმი, რომლითაც ძალაში დატოვა წინა ოქმით მიღებული გადაწყვეტილება და სატენდერო პროცედურები გააგრძელა.

თავის მხრივ „თბილლიფტსერვისმა“ ამჯერად სატენდერო კომისიის ახალი ოქმი გაასაჩივრა.

„გაუქმდეს „საქალაქო ინფრასტრუქტურისა და კეთილმოწყობის სამმართველოს“ მუდმივმოქმედი სატენდერო კომისიის 2024 წლის 10 ივლისის N38-2 ოქმი და შემსყიდველმა ორგანიზაციამ სახელმწიფო შესყიდვა განახორციელოს სახელმწიფო შესყიდვების მარეგულირებელი კანონმდებლობის სრული დაცვით.“ – აღნიშნული იყო საჩივარში.

კომპანიის ამ მეორე საჩივარზე დავების განხილვის საბჭომ გადაწყვეტილება დღეს, 24 ივლისს გამოაქვეყნა.

„საბჭო მიიჩნევს, რომ ა(ა)იპ „საქალაქო ინფრასტრუქტურისა და კეთილმოწყობის სამმართველოს“ სატენდერო კომისიამ დეტალურად უნდა იმსჯელოს წინამდებარე გადაწყვეტილების სამოტივაციო ნაწილსა და [„თბილლიფტსერვისის“] საჩივარში მითითებულ გარემოებებზე და მხოლოდ აღნიშნულის შემდგომ მიიღოს არგუმენტირებული გადაწყვეტილება“ – აცხადებს დავების საბჭო.

საბჭომ ამჯერადაც დაავალა სატენდერო კომისიას გასაჩივრებული ოქმით მიღებული გადაწყვეტილების გადასინჯვა და „სახელმწიფო შესყიდვის განხორციელება სახელმწიფო შესყიდვების მარეგულირებელი კანონმდებლობის მოთხოვნათა სრული დაცვით“.

„ქ. ბათუმში, საცხოვრებელი სახლების სადარბაზოში არსებული ამორტიზებული ლიფტების დემონტაჟისა და ახალი ელექტრონული ლიფტების მონტაჟის სამუშაოებზე“ მერიის სამმართველომ ტენდერი 2024 წლის 12 ივნისს გამოაცხადა 8 მილიონ 802 ათას 222 ლარით.

ტენდერში წინადადებების მიღება 2024 წლის 4 ივლისს დასრულდა.

შესყიდვების პორტალის მიხედვით, ელექტრონულ ტენდერში სამმართველოს ყველაზე დაბალ ფასად მომსახურებას თურქული სს „აველიჯე მაქინე სანაი ვე თიჯარეთი“ სთავაზობს – 7 622 749 ლარად.

• ტენდერის პირობის მიხედვით სამუშაოს შესრულების ვადაა ხელშეკრულების გაფორმებიდან 2025 წლის 10 დეკემბრის ჩათვლით პერიოდი.

დავების საბჭოში „თბილლიფტსერვისის“ საჩივრების განხილვის პარალელურად, მერიის სამმართველოს სატენდერო კომისია თურქული კომპანიის მიერ წარდგენილ დოკუმენტებს განიხილავდა. ამასთან, კომისიამ დოკუმენტების განხილვის ვადა „დოკუმენტების მოცულობიდან გამომდინარე“ 5 დღით გაახანგრძლივა.

სატენდერო კომისიას ამჯერად დავების საბჭოს მეორე გადაწყვეტილების განხილვაც მოუწევს. 

• 5-მილიონიანი ტენდერისთვის დავის დეტალები შეგიძლიათ ნახოთ ამ ბმულზე:

ვის დარჩება 5-მილიონიანი ტენდერი – ბათუმის მერიას 3 კომპანია უჩივის