ქედის ისტორიულ მუზეუმს ახალი შენობა ექნება. ქედის მერია წელს მშენებლობის პროექტს მუნიციპალიტეტის განვითარების გეგმის საპროექტო პროგრამის ფარგლებში გამოყოფილი თანხიდან შეისყიდის.
ქედის მერი, ლევან გორგილაძე ამბობს, რომ არსებული შენობა ძველია, მუზეუმისთვის შეუსაბამო და არასაკმარისი ადგილის გამო ექსპონატების ნაწილი საგამოფენო სივრცეში არასათანადოდაა განთავსებული.
„მუზეუმი სამრეწველო ზონაშია განთავსებული. შენობა სტანდარტს ვერ აკმაყოფილებს, ძველი და ამორტიზებულია.
პირველ ეტაპზე მშენებლობისთვის პროექტს შევისყიდით. ამის შემდეგ დაზუსტდება, რა თანხა დასჭირდება მუზეუმისთვის შენობის აშენებას. რაც შეეხება ზუსტ ადგილს, სად იქნება მუზეუმი, ეს ჯერ გადაწყვეტილი არ გვაქვს, რამდენიმე ვერსია არის. ვფიქრობთ, ძველი ხიდის მიმდებარედ ან პარკში გაკეთდეს, ყოველ შემთხვევაში, ისეთ ადგილზე, რომ ტურისტული დატვირთვა ჰქონდეს,“ – ამბობს ქედის მერი.
18 წლის წინ გახსნილი ქედის ისტორიული მუზეუმი მაღალმთიანი აჭარის ძველი ყოფის ამსახველ ექსპონატებს ინახავს. მუზეუმში 4000-ზე მეტი ექსპონატია დაცული, ექსპონატების ნაწილი [შურდულის ქვები, თოხი] 8-10 ათასი წლის წინანდელია.
მთავარ ფოტოზე: ლევან გორგილაძე, ქედის მერი
