ქედის მუნიციპალიტეტში ჩოგბურთის კორტები 2011 წელს მოაწყეს. ამისთვის 84 667 ლარი დაიხარჯა. წვრთნები კორტზე ცოტა ხანს ტარდებოდა, 2012 წლის თებერვლის შემდეგ კი ეს სპორტული სივრცე, ფაქტობრივად, დაკეტილია. მიზეზი – კორტის საფარი ობიექტის ჩაბარებიდან სულ რამდენიმე თვეში მწყობრიდან გამოვიდა.
ჩოგბურთის კორტები ქედაში ენმ-ის წევრის, ირაკლი ბარამიძის გამგებლობის დროს, ელექტრონულ ტენდერში გამარჯვებულმა შპს „გულები ო.დ“-მა ააშენა. 2011 წელს აშენებულ კორტებთან დაკავშირებით 2016 წელს, მოულოდნელად, გამოძიება დაიწყო: სამსახურებრივი უფლებამოსილების ბოროტად გამოყენებასა და სამსახურებრივ სიყალბეში ბრალი ქედის გამგებლის ყოფილ მოადგილეს, ასევე გამგეობის საფინანსო და ზედამხედველობის სამსახურების ყოფილ უფროსებს დასდეს.
პროკურატურა ამტკიცებდა, რომ ქედის გამგეობის ყოფილმა თანამდებობის პირებმა დაუსრულებელი სამუშაოები ჩაიბარეს. ძიების ეს ვერსია არ გაიზიარა სასამართლომ – ბრალდებულების მიმართ გამამართლებელი განაჩენი ბათუმის საქალაქო სასამართლოს მოსამართლე თამარ ბეჟანიშვილმა 2017 წლის ნოემბერში გამოიტანა.
კორტების პოლიტიკურ ინსტრუმენტად გამოყენების მცდელობის დასრულების შემდეგ რას უპირებს ამ სპორტულ კომპლექსს ქედის მერია? ექნება თუ არა რაიმე ფუნქცია მოედანს, რომლის მოწყობაზეც 84 667 ლარი დაიხარჯა? – ქედის მოქმედი მერი ლევან გორგილაძე აცხადებს, რომ ამ საკითხზე გადაწყვეტილება სასპორტო სკოლის დირექტორმა გივი ბარამიძემ უნდა მიიღოს.
„სპორტსკოლას მე ვერ გადავუწყვეტ, პირველ რიგში რა უნდა გაკეთდეს. ეს სასპორტო სკოლის დირექტორმა უნდა გადაწყვიტოს. ვფიქრობ, მნიშვნელოვანია ორგანიზაციებმა საკუთარი საჭიროებები დამოუკიდებლად განსაზღვრონ,“ – ამბობს ქედის მერი და დასძენს, რომ საჭიროების შემთხვევაში მერია კორტების რეაბილიტაციისთვის თანხის მოძიებაზე იფიქრებს.
ქედის მერიის დაქვემდებარებაში მყოფ აიპებისა თუ შპს-ების ბიუჯეტს მერია განსაზღვრავს – თანხა, ძირითადად, თანამშრომელთა შრომის ანაზღაურებასა და ინვენტარის შეძენაზე იხარჯება. რაც შეეხება ინფრასტრუქტურის მოწესრიგებას, ორგანიზაციებს სარემონტო თუ სამშენებლო სამუშაოებისთვის საჭირო ფინანსური რესურსი ბიუჯეტში გაწერილი არ აქვთ.
სასპორტო სკოლის დირექტორი, გივი ბარამიძე ფიქრობს, რომ კორტების საფარის გარემონტება იმ სახით, რა სახითაც დღეს არსებობს, პრობლემას ვერ მოაგვარებს, რადგან ღია მოედანი აჭარის მთის კლიმატისთვის შეუსაბამოა.
„არაერთხელ გარემონტდა კორტის საფარი, მაგრამ პრობლემა ვერ მოგვარდა, ისევ გამოვიდა მწყობრიდან. კლიმატური პირობებია გასათვალისწინებელი, აქ 6-7 თვე ზამთარი იცის, ცივი და ცუდი ამინდი, გაარემონტო საფარი, მაგრამ მხოლოდ ზაფხულში გამოიყენო მოედანი, ვფიქრობ, პრობლემას ვერ მოაგვარებს, მოედანი გადახურული უნდა იყოს,“ – ამბობს გივი ბარამიძე.
ქედის სასპორტო სკოლის წლიური ბიუჯეტი 121 500 ლარია. ეს თანხა თანამშრომელთა ხელფასების გარდა სპორტული ფორმებისა და ინვენტარის შეძენას ხმარდება. რაც შეეხება სპორტულ ღონისძიებებს, მას, მერიის დაკვეთით, ელექტრონულ ტენდერში გამარჯვებული კომპანია ატარებს.
