სასტუმროს ნომრები, ახალი სცენა და ლიტერატურული კაფე დრამატულ თეატრში

აჭარის განათლების სამინისტროს ცნობით, ილია ჭავჭავაძის დრამატული თეატრის სარეაბილიტაციო პროექტი ითვალისწინებს შენობის სრულ რეკონსტრუქციას. თეატრის შენობის ფასადს ჩაუტარდება რესტავრაცია და შენობას დაუბრუნდება ავთენტური სახე. პროექტის თანახმად რესტავრაცია, ასევე, ჩაუტარდება თეატრის ჭაღს, სკამებს; მოეწყობა შემოქმედებითი დასისა და ადმინისტრაციის წევრებისთვის ოთახები; შეიცვლება გათბობა – ვენტილაციის სისტემა; დამონტაჟდება ახალი განათების და გახმოვანების აპარატურა. პროექტის თანახმად თეატრის მუზეუმი განთავსდება პირველ სართულზე. ასევე, პირველ სართულზე, ფოიეში მოეწყობა ლიტერატურული კაფე.

შენობა კულტურული მემკვიდრეობის ძეგლია,ამიტომაც სარეაბილიტაციო პროექტი შეთანხმებულია კულტურული მემკვიდრეობის დაცვიის საგენტოსთან.  მოწვეული რეჟისორისთვის, მხატრისთვის, მსახიობებისთვის თეატრში სამი სასტუმრო ნომერი მოეწყობა. ასევე, სიახლეა ის, რომ შენობაში დამატებით მცირე სცენას მოაწყობენ.

რეაბილიტაციის დასრულების შემდეგ თეატრს ექნება სამი სცენა, დამონტაჟდება სინქრონული თარგმნის აპარატი, რაც თეატრს საშუალებას მისცემს უმასპინძლოს საერთაშორისო ფესტივალებს. თეატრის სარეაბილიტაციო სამუშაოებს ასრულებს შ.პ.ს. „ბურჯი“.

აჭარის მთავრობის თავმჯდომარის განცხადებით, ეს იქნება მსოფლიოში ერთ-ერთი საუკეთესო თეატრი, მისივე ინორმაციით სარემონტო სამუშაოებისთვის დაახლოებით 8 მილიონზე მეტი ლარი დაიხარჯება.

ბათუმში დასრულდა ახალი სცენის მოწყობა. აჭარის მთავრობის გადაწყვეტილებით, აჭარის რესპუბლიკური ბიუჯეტიდან გამოიყო თანხა თეატრის ცალკე მდგომი მცირე სცენის მშენებლობისთვის. პროექტის თანახმად აშენდა ერთსართულიანი შენობა დაახლოებით 100 მაყურებელზე გათვლილი დარბაზით.

მშენებლობისთვის დაიხარჯა 240 000 ლარი. სამშენებლო სამუშაოები აწარმოვა ტენდერში გამარჯვებულმა კომპანია შ.პ.ს. „ჯი თი აი 2007“-მა. უახლოეს პერიოდში იგეგმება თეატრის მცირე სცენის გახსნა ორი პრემიერით: „ბონდოს ღამე“- რეჟისორი ანდრო ენუქიძე, „ღამის პორტიე“- რეჟისორი ზაზა სიხარულიძე.

აჭარის  განათლების, კულტურისა და სპორტის სამინისტროს დაფინასებით ხორციელდება პროექტი- „თეატრი კედელთან“. პროექტის ფარგლებში დამუშავდა და წინასწარ შექმნილი ესკიზის მიხედვით მიმდინარეობს ახალი თეატრალური სივრცის – გვერდითი კედლის მოხატვა. პროექტში ჩართულია ორი ბათუმელი მხატვარი – ლუკა ბესელია და ირინა ტორონჯაძე, რომლებიც 75 კვ.მ. მოცულობის უსახურ კედელზე ქმნიან ესთეტიკურად მიმზიდველ ახალ სტრიტ არტ პროდუქტს. პროექტის ღირებულება 11 000 ლარია.