ბათუმის ქუჩებში ზებრა გადასასვლელები ისევ გადაშლილია.
„ბათუმელებმა“ დღეს, 17 მაისს, რამდენიმე ქუჩა შემოიარა, სადაც ზებრა გადასასვლელები ან საერთოდ არ არის, ან ნახევრად წაშლილია.
ვაჟა-ფშაველას და ბრწყინვალეს ქუჩების კუთხე ბათუმში
მაგალითად, ვაჟა-ფშაველას და გიორგი ბრწყინვალეს ქუჩების გადაკვეთაში, თითქმის ყველგან გადაშლილია ქვეითთა გადასასვლელები.
ეს მონაკვეთები „ბათუმის ავტოტრანსპორტმა“ გასულ ზაფხულს გადაღება, თუმცა ახლა ისევ შესაღებია.
ნახევრად გადაშლილი ზებრა ვაჟა-ფშაველაზე
ქუჩების მონაკვეთებში, სადაც შუქნიშანი არ დგას, მოქალაქეების უსაფრთხოებას სწორედ ზებრა გადასასვლელები განსაზღვრავს, რადგან მძღოლი ვალდებულია შეაჩეროს სვლა და გზა ქვეითს დაუთმოს. გადაშლილი ზებრების გამო, მოქალაქეები ხშირად საფრთხის ქვეშ არიან.
ზებრა გადასასვლელები წაშლილია პუშკინისა და თავდადებულის ქუჩების კვეთაშიც.
თავდადებულის და ბრწყინვალეს ქუჩების კვეთაშიც ზებრა გასულ ზაფხულს გადაიღება, თუმცა წელს მხოლოდ ნაკვალევია შემორჩენილი.
ასე გამოიყურება ზებრა გადასასვლელი 26 მაისის ქუჩაზე.
ბათუმის მერიამ ვახტანგ გორგასლისა და ფარნავაზ მეფის ქუჩებზე ქვაფენილი აყარა და ასფალტი დააგო. სამუშაოები დიდი ხანია დასრულებულია, თუმცა არცერთ ამ ქუჩაზე, ზებრები „ბათუმის ავტოტრანსპორტს“ არ განუახლებია.
ფარნავაზ მეფის ქუჩაზე ფეხით გადასასვლელი მოხაზული საერთოდ არ არის.
გორგასლის ქუჩაზე ზებრები არ დაუხაზავთ მას შემდეგ, რაც ქვაფენილი ასფალტით ჩაანაცვლეს.
ქალაქში ზებრა გადასასვლელების მოხაზვაზე პასუხისმგებელი „ბათუმის ავტოტრანსპორტია“. კომპანიას ვკითხეთ, რა ხარისხის საღებავს იყენებენ უსაფრთხოების ნიშნულებისთვის და რატომ იშლება ის მოკლე დროში? ასევე, რა პერიოდულობით უნდა განახლდეს ზებრები და დაგეგმილია თუ არა წელს განახლება?
„ბათუმის ავტოტრანსპორტიდან“ დღეს „ბათუმელებმა“ ამ კითხვებზე პასუხი ვერ მიიღო. კომპანიის განმარტების შემთხვევაში, ინფორმაცია განახლდება.
გადაშლილია ზებრა გადასასვლელი პუშკინის ქუჩაზეც, რომელიც გასულ წელს შეიღება.
გასულ წელს ზებრა გადასასვლელები „ბათუმელების“ რეპორტაჟის შემდეგ განაახლეს ცალკეულ ქუჩებზე, თუმცა წელს, იგივე ქუჩებზე, ქვეითთა გადასასვლელები ისევ წაშლილია.
პუშკინის და ასათიანის ქუჩის კიდევ ერთი მონაკვეთი, სადაც ასევე წაშლილია ქვეითთა გადასასვლელი.
ზებრა გადასასვლელი 26 მაისის ქუჩაზე.
