დღეს, 19 დეკემბერს, აჭარის მთავრობის სხდომის დასრულების შემდეგ, მთავრობის თავმჯდომარემ ჟურნალისტების კითხვებს უპასუხა. სხვა საკითხებთან ერთად ზურაბ პატარაძე შეეხო აჭარის კულტურული მემკვიდრეობის ზონალური საბჭოს დათხოვნის შესახებ მის მიერ მისაღებ გადაწყვეტილებას:
„თქვენ იცით, რომ დედაქალაქში საერთოდ გაუქმდა ზონალური საბჭო. გვქონდა შეხვედრა არასამთავრობო ორგანიზაციებთან, სხვადასხვა ექსპერტებთან. თუ ეს საბჭო გააგრძელებს მუშაობას ამ ფორმით, ჩვენ მზად ვართ მასში მეტად იყოს ჩართული დარგის სპეციალისტები, მათ შორის არქიტექტორები. ჩვენ მათთან ერთად მივიღებთ გადაწყვეტილებებს. ჩვენ დავეთანხმეთ მოსაზრებას, რომ ეს საბჭო არ უნდა იყოს სრულად დაკომპლექტებული აღმასრულებელი ხელისუფლების წარმომადგენლებით. უახლოეს პერიოდში ვგეგმავთ ამის განხორციელებას, გადაწყვეტილება უკვე მიღებულია, მიმდინარეობს ტექნიკურ დეტალებზე შეთანხმება“, – განაცხადა ზურაბ პატარაძემ.
დაახლოებით ორი თვის წინ, 31 ოქტომბერს, დახურულ შეხვედრაზე აჭარის მთავრობის თავმჯდომარე ზურაბ პატარაძე ორგანიზაცია „ბათომს“ შეჰპირდა, რომ აჭარის კულტურული მემკვიდრეობის ზონალურ საბჭოს დაითხოვდა და ახალ საბჭოს დარგის სპეციალისტებით დააკომპლექტებდა.
„ბათომში“ მიიჩნევენ, რომ საჯარო მოხელეებით დაკომპლექტებული საბჭო ვერ მიიღებს კვალიფიციურ გადაწყვეტილებას ძეგლებთან მიმართებაში, რადგან, უმეტეს შემთხვევაში, საბჭოს წევრებს დარგთან მხოლოდ ირიბი შეხება აქვთ. ორგანიზაციაში თვლიან, რომ ამ საბჭოს არაკომპეტენტურმა გადაწყვეტილებებმა ძველი ბათუმის იერსახე მნიშვნელოვნად დააზიანა.
ამავე თემაზე: ზურაბ პატარაძე ზონალური საბჭოს დათხოვნას არ ჩქარობს
