ხელვაჩაურისა და ბათუმის მუნიციპალიტეტები საზღვრების ცვლილების საკითხზე მუშაობენ. საუბარია ზოგიერთი ტერიტორიის ხელვაჩაურის მუნიციპალიტეტისთვის უკან დაბრუნებაზე, რაც „ნაციონალური მოძრაობის“ ხელისუფლებაში ყოფნის დროს ბათუმს გადაეცა. ბათუმის საზღვრები სწორედ ამის ხარჯზე გაიზარდა.
ხელვაჩაურის მუნიციპალიტეტის საკრებულოს თავმჯდომარის ნადიმ ვარშანიძის ინფორმაციით, „განიხილება მაშინ გადაცემული ტერიტორიების ნაწილის დაბუნება“.
პროექტის პირველი ვარიანტი ხელვაჩაურის მუნიციპალიტეტს მზად მომავალი წლის იანვარში ექნება. ნადიმ ვარშანიძე არ აკონკრეტებს, რომელი ტერიტორიების დაბრუნების საკითხს განიხლავენ მუნიციპალიტეტები. საკრებულო ამ წინადადებასთან დაკავშირებით მოსახლეობის გამოკითხვასაც გეგმავს.
ბათუმის საზღვრები „ერთიანი ნაციონალური მოძრაობის“ მმართველობის დროს ქობულეთისა და ხელვაჩაურის მუნიციპალიტეტების ტერიტორიის ხარჯზე გაფართოვდა. პარლამენტის გადაწყვეტილებით, ბათუმის ადმინისტრაციულ საზღვრებში მოექცა მახინჯაურის, დაბა ჩაქვის ნაწილი (მდინარე ჩაქვის წყლამდე) და ბათუმის ადმინისტარციული საზღვრის აღმოსავლეთ ნაწილში დასახლებული პუნქტები – ურეხი, მნათობსა და ფერიას შორის არსებული ტერიტორია, ასევე თოდოგაურის, შავლიძეების და მახვილაურის მეურნეობის ნაწილი, მდინარე მეჯინისწყლის სამხრეთით დაბა ხელვაჩაურის ტერიტორია.
