ხელვაჩაურის მუნიციპალიტეტის მერიამ მიმწოდებლებთან სასამართლო დავები წააგო და მათ სასარგებლოდ, ჯამში, 218 221 ლარის გადახდა დაეკისრა. ხელვაჩაურის საკრებულოს ოპოზიცია ითხოვს, საქმეები პროკურატურამ შეისწავლოს და გამოარკვიოს, ეს შედეგი დაუდევრობამ გამოიწვია თუ კორუფციული გარიგება იყო.
„ეს არის არამიზნობრივი ხარჯი, 200 000 ლარზე მეტი უკვე გამოყოფილია ბიუჯეტში, ეს არის კორუფცია და ეს პროკურატურამ უნდა გამოარკვიოს,“ – ამბობს ხელვაჩაურის საკრებულოს წევრი მიშა ბოლქვაძე.
შესაბამისი განცხადებით ხელვაჩაურის საკრებულოს ენმ-ის ფრაქციამ პროკურატურას უკვე მიმართა.
ხელვაჩაურის მერიის ინფორმაციით, ქუთაისის სააპელაციო სასამართლომ შპს „კონსულის“ სასარგებლოდ 21 812 ლარის გადახდა დააკისრა მერიას. „Modern architectural group“ -ის სასარგებლოდ – 132 246, ხოლო შპს „ლადას“ სასარგებლოდ – 64 163 ლარი.
ენმ-ის ფრაქციის ინფორმაციით, მერიამ ბიუჯეტში შესაბამისი ცვლილების დამტკიცებისას ამ საქმეებთან დაკავშირებულ კითხვებს არ უპასუხა. მათივე განმარტებით, კომპანიებს ხელშეკრულებები მოულოდნელად შეუწყვიტეს, რაც დავის დაწყების მიზეზი გახდა.
შესყიდვები ხელვაჩაურის მუნიციპალიტეტის ყოფილი მერის, ჯუმბერ ვარდმანიძის დროს განხორციელდა.
„ბათუმელები“ ცდილობს დაუკავშირდეს ხელვაჩაურის მერიას. უწყების პოზიციას ამ საკითხზე, მოწოდების შემთხვევაში, აქვე შემოგთავაზებთ.
