აჭარის კულტურული მემკვიდრეობის სააგენტომ აჭარაში კულტურული მემკვიდრეობის ძეგლების რაოდენობის დაზუსტებაზე მუშაობა დაასრულა. სააგენტოს მონაცემებით, აჭარაში სულ 373 ძეგლია, აქედან 248 მდებარეობს ბათუმში, ხელვაჩაურში – 26, ქედაში – 41, ქობულეთში – 34, ხულოში – 14, შუახევში – 10.
სააგენტოს ნებართვებისა და მონიტორინგის განყოფილების უფროსის, მირზა ცეცხლაძის ინფორმაციით, მუშაობისას გამოიკვეთა პრობლემები რამდენიმე მიმართულებით: ეს იყო დუბლირებები, როცა ერთსა და იმავე შენობაზე რამდენიმე ბრძანება იყო გამოცემული, სულ 151 დუბლირებული ჩანაწერი და ექვსი გასამმაგებული ჩანაწერი დაფიქსირდა. იყო ასევე იდენტიფიცირების პრობლემა, როცა ბრძანების მიხედვით ფიქსირდებოდა მისამართი, თუმცა არ იყო დაკონკრეტებული ამ მისამართზე, რომელ შენობას მიანიჭეს ძეგლის სტატუსი. იყო შემთხვევები, როცა მითითებული იყო მისამართი და სულ სხვა მისამართზე არსებულ ფოტოზე ასახული იყო შენობა.
„დაზუსტების მიზნით ძველი ბათუმი მთლიანად შემოვიარეთ. ერთ შენობას მივუსწარით ფაქტობრივად, შემოსული იყო წინადადება და ზონალური საბჭოც შეითანხმებდა ამას, რადგან არ ფიქსირდებოდა ჩამონათვალში როგორც ძეგლი“, – განაცხადა მირზა ცეცხლაძემ.
მისივე ინფორმაციით, მიუხედავად იმისა, რომ ბათუმში არსებული ძეგლების ინვენტარიზაციაზე, 2015 წელს, ბათუმის მერიის ტენდერში გამარჯვებულმა კომპანიამ „გეოგრაფიკმა“ იმუშავა, ამ მიმართულებით ბათუმშიც ბევრი დეტალი იყო დასაზუსტებელი.
სააგენტო შემდეგი ეტაპისთვის იმ შენობების შესწავლას გეგმავს, რომლებთან დაკავშირებითაც არსებობს ვარაუდები, რომ ისინი ძეგლის სტატუსს იმსახურებენ. შემდეგ კი მომზადდება დოკუმენტაცია მათ გაძეგლებასთან დაკავშირებით.
