Batumelebi | ქედის საკრებულოს დეპუტატის ანაზღაურება 60 ლარით შემცირდება ქედის საკრებულოს დეპუტატის ანაზღაურება 60 ლარით შემცირდება – Batumelebi
RU | GE  

ქედის საკრებულოს დეპუტატის ანაზღაურება 60 ლარით შემცირდება

 

 

ქედის მუნიციპალიტეტის საკრებულოს რიგითი დეპუტატის ანაზღაურება 60 ლარით შემცირდება, საკრებულოს ამ გადაწყვეტილებას დეპუტატებმა დღეს,31 აგვისტოს გამართულ სხდომაზე დაუჭირეს მხარი. 

 

ქედის საკერებულოს სხდომა | 31 აგვისტო 2015 | დეპუტატები: როლანდ დუმბაძე, რომან ბედინაძე, თამაზ შარაშიძე

 

 საკრებულოს რიგითი დეპუტატის უფლებამოსილების განხორციელებისთვის ანაზღაურების შემცირებაზე  წარმოდგენილმა საკითხმა სხდომაზე დამსწრე 17 დეპუტატიდან 16 მხარდაჭერა მიიღო, საკითხს მხოლოდ პარტია „ერთიანი ნაციონალური მოძრაობის“ დეპუტატმა ვაჟა ბოლქვაძემ არ დაუჭირა მხარი,  დეპუტატები, რომლებმაც მხარი დაუჭირეს მათი უფლებამოსილების შესრულებისთვის ანაზღაურების შემცირებას განმარტავენ, რომ ანაზღაურების შემცირება თვითმართველობის კოდექსით განისაზღვრება, წინააღმდეგობას კი აზრი არ ჰქონდა.

 

„საკითხს იმიტომ დავუჭირე მხარი რომ ჩემი ერთი გადაწყვეტილებით ვერაფერს ვერ ვცვლიდი და ეს გამოდიოდა საბოტაჟი, მინიმუმ 60 ლიტრი საწვავი მჭირდება იმისთვის, რომ ჩემს ამომრჩეველს შევხვდე“ – აცხადებს საკრებულოს დეპუტატი ნოდარ ძნელაძე.

 

დღეს გამართულ საკრებულოს სხდომაზე დეპუტატებმა მუნიციპალიტეტის გამგებლის დავით დუმბაძის ანგარიში მოისმინეს, რის შემდეგაც ერთიანი ნაციონალური მოძრაობის დეპუტატმა ვაჟა ბოლქვაძემ გამგებლის გადადგომა მოითხოვა, მისი თქმით მუნიციპალიტეტის გამგეობა თანხებს არამიზნობრივად ხარჯავს და კორუპციის ნიშნები იკვეთება.

 

„არამიზნობრივად გაიხარჯა წყლისა და კანალიზაციის სისტემის გამართვაზე გამოყოფილი თანხები, არაკანონიერად გაიცა გათავისუფლებულ თანამშრომლებსა და 2014 წელს სტიქიის შედეგად დაზარალებულ ოჯახებზე კომპენსაცია“ – განაცხადა ვაჟა ბოლქვაძე და გაწეული ხარჯების მიზნობრიობის დასადგენად კონტროლის პალატის მოწვევა მოითხოვა.

 

„მხოლოდ ერთ საკითხთან – მშენებლობასთან დაკავშირებით გამოთქმულ შენიშვნას ვითვალისწინებ, დანარჩენი შენიშვნები თითიდან გამოწოვილია, არცერთ საკითხში არ ვეთანხმები, რაც შეეხება კონტროლის პალატის მოწვევის საკითხს, ჩვენ ორჯერ გავაგზავნეთ მიმართვა კონტროლის პალატასთან, როგორც მიმდინარე ასევე გასულ წელსაც, რომ ჩაეტარებინათ კომპლექსური შესწავლა და ჩვენი მოთხოვნა გეგმიური შესწავლის დროს იქნება გათვალისწინებული“ – აცხადებს დავით დუმბაძე.

 

დღეს გამართულ საკრებულოს სხდომაზე ქედაში სულ 20 საკითხი განიხილეს.

 

ქედის საკერებულოს სხდომა | 31 აგვისტო 2015 | მარჯვნივ: საკრებულოს თავმჯდომარის მოადგილე გურამ ანანიძე, ქედის გამგებელი დავით დუმბაძე და ქედის საკრებულოს თავმჯდომარე ამირან ცინცაძე

 

ნეტგაზეთის მასალების სხვა გამოცემებში გადაბეჭდვის წესი
ეკა ბარამიძე