Batumelebi | ახალი ბაგა-ბაღები ქედაში ახალი ბაგა-ბაღები ქედაში – Batumelebi
RU | GE  

ახალი ბაგა-ბაღები ქედაში

 

საბავშვო ბაღების მშენებლობისთვის ადგილობრივი ბიუჯეტიდან 269 580 ლარი გამოიყო, 75 აღსაზრდელზე გათვლილი საბავშვო ბაღები დოლოგნისა და ცხმორისის თემებში, სოფელ ახოსა და დოლოგანში, ყოფილ ადმინისტრაციულ შენობებში გაიხსნება.

 

სარეკონსტრუქციო სამუშაოების დამკვეთი ქედის მუნიციპალიტეტის საკრებულოა,  შესაბამისად სამშენებლო და სარემონტო სამუშაოებთან დაკავშირებით ტენდერი მუნიციპალიტეტის გამგეობამ გამოაცხადა.

 

ახოში ბაგა-ბაღის სარემონტო სამუშაოებს ტენდერში გამარჯვებული შპს „ჯეო-ხარისხი“ აწარმოებს. სარემონტო სამუშაოებთან დაკავშირებით ქედის მუნიციპალიტეტის გამგეობამ ხელშეკრულება გამარჯვებულ ფირმასთან 30 ივლისს 122 000 ლარზე გააფორმა, სატენდერო პირობების მიხედვით ობიექტი ნოემბერში უნდა ჩაბარდეს.

 

დოლოგნის ბაგა-ბაღის მოწყობისთვის 120 000 ლარია გამოყოფილი. ამ სოფელში ბაღის მოწყობისთვის ყოფილი ადმინისტრაციული შენობის რეაბილიტაცია მას შემდეგ დაიწყება, რაც ქედის მუნიციპალიტეტის მიერ გამოცხადებულ ტენდერში გამარჯვებული ფირმა გამოვლინდება, ბაგა-ბაღის მოწყობისთვის ტენდერი გასულ კვირას გამოცხადდა.

 

„ქედის ბაგა-ბაღების გაერთიანების“ დირექტორის აიშე თებიძის თქმით, ამ  ეტაპზე არ არის გარკვეული, როგორ შეარჩევენ ახალგახსნილ ბაღებში თანამშრომლებს.

ნეტგაზეთის მასალების სხვა გამოცემებში გადაბეჭდვის წესი
ეკა ბარამიძე