„ბათუმის აქციის საქმეზე“ ორ არასრულწლოვანს საპროცესო შეთანხმება დღეს, 26 ივნისს, გაუფორმა პროკურატურამ. მოსამართლე გიორგი გრატიაშვილმა მასობრივ ძალადობაში ბრალდებული არასრუწლოვნების შემთხვევა დახურულ სხდომაზე განიხილა.
სასამართლოს გადაწყვეტილებით, 17 წლის მაგსუდ ბ. წელიწადნახევრის შემდეგ გათავისუფლდება პატიმრობიდან. სამი წლის განმავლობაში ის პირობითი მსჯავრის ქვეშ იქნება. სამწლიანი პირობითი მსჯავრი შეეფარდა არასრუწლოვან ირაკლი ჩ.-საც. ის აქამდე გირაოს სანაცვლოდ იყო გათავისუფლებული. საპროცესო შეთანხმების მთავარი პირობა ბრალის აღიარებაა.
არასრულწლოვნებთან საპროცესოების გაფორმებამდე პროკურატურამ შეთანხმებას კიდევ ორ ბრალდებულთან მიაღწია. მინდია ბერიძე ერთი წლით დარჩება პატიმრობაში, რევაზ ქერქაძე – 6 თვით.
„ბათუმის აქციის საქმეზე“ პროკურატურამ სულ 21 პირი დააკავა. დანარჩენი 17 ბრალდებული ამ ეტაპზე ბრალს არ აღიარებს და მათი სასამართლო პროცესი გრძელდება. ბრალდებულებს 7-დან 11 წლამდე თავისუფლების აღკვეთა ელით. დაკავებულებიდან ორს – მერაბ ღოღობერიძესა და ირაკლი ჩხვირკიას მასობრივი ძალადობის ორგანიზებას ედავებიან.
ამავე თემაზე:
17 წლის პატიმარი და მისი უმცროსი და-ძმები, რომელთაც სკოლაში არასდროს უვლიათ
