ენმ: თუ ხელისუფლება არ გამოიძიებს მომხდარს, ნიშნავს რომ დესტაბილიზაციის შექმნა სურდა

დღეს 13  მარტს, „ნაციონალური მოძრაობის“ წევრებმა აჭარაში, ლევან ვარშალომიძემ და ელგუჯა ბაგრატიონმა ჟურნალისტებთან განაცხადეს რომ „ნაციონალური მოძრაობა“ ემიჯნება 12 მარტს  ბათუმში განვითარებულ მოვლენებს და აცხადებს რომ თუკი ხელისუფლება არ გამოიძიებს  ვანდალური აქციის დამკვეთებს და შემსრულებლებს, „ეს იმას ნიშნავს რომ დესტაბილიზაციის შექმნა ხელისუფლებას სურდა“.

„ჩვენი პარტია მართავდა აქციებს და კიდევ გამართავს, მაგრამ კმარა გადმობრალების რეჟიმში ქვეყნის მართვა, ამჯერად ეს არ გამოუვა ხელისუფლებას. უმჯობესია თუკი  ხელისუფლება   რეგიონის დაზიანებული იმიჯის აღდგენაზე იზრუნებს, რადგან  აჭარისთვის მთავარია ტურიზმი და მისი განვითარება“- ამბობს ლევან ვარშალომიძე.

მისი განცხადებით, ხელისუფლების უპასუხისმგებლო ქმედებამ,  ქვეყანაში ერთ-ერთ ავტორიტეტულ ინსტიტუტს, – პოლიციასაც დაუკარგა ხალხის ნდობა.

„ჩვენ ამ ფაქტით შეურაცხყოფილები ვართ.  ხელისუფლებამ უნდა გამოიძიოს ვანდალური აქტი და მკვეთრად  დასაჯაროს როგორც შემსრულებლები, ასევე დამკვეთები. წინააღმდეგ შემთხვევაში, მას სურს აჭარაში დესტაბილიზაციის შექმნა“.

ელგუჯა ბაგრატიონის თქმით, 12 მარტს საპროტესტო აქცია სპონტანურად დაიწყო და შემდეგ მოხდა მისი პროვოცირება.

„აქციაზე იყო ყველა პარტიის წარმომადგენელი, მათ შორის „ქართული ოცნების“. აქცია იყო სუს-ის მიერ ორგანიზებული.  ჩვენ ვიყავით მედიატორი, რომ ადამიანების მოთხოვნა მიგვეტანა ხელისუფლებასთან“-ამბობს ის.

12 მარტს საპროტესტო აქცია, პატრულის მიერ მოქალაქეების დაჯარიმების ფაქტზე დაიწყო, მოგვიანებით კი პროცესები უმართავი გახდა.  საპროტესტო აქცია სპეცდანიშნულების რაზმის გამოჩენის შემდეგ დაიშალა.