ჯიმი ვარშანიძემ, რომლის დაჯარიმებაც ბათუმში, 11 მარტს განვითარებული მოვლენების გაცხადებული მიზეზი გახდა, აჭარის საზოგადოებრივი მაუწყებლის პირდაპირ ეთერში პოლიციის მიერ მის დაკავებაზე ისაუბრა:
„მოვდიოდით მე და მამაჩემი სასაფლაოდან, გავაჩერე პლაზას წინ, „ირინას აფთიაქში“ ავდიოდი და ავარიული ჩართული მქონდა, ძრავა არ მქონდა გათიშული და რომ დავბრუნდი, უკან მომადგა პატრულის მანქანა. ავუხსენი სიტუაცია და ვთხოვე რომ გავეშვი. როცა აღარ გამიშვა, შეიძლება მეც ავღელდი და რაღაც ვუთხარი. მამაჩემი მაწყნარებდა. მაინც უნდა დავწერო ჯარიმაო და მერე დაგვაკავეს“.
ჯიმი ვარშანიძე ამბობს, რომ დაკავების დროს ძალით ჩასვეს მანქანაში, თუმცა წინასწარი დაკავების იზოლატორში არ უცემიათ. „არავის არ ვუცემივართ. სახალხო დამცველის წარმომადგენელიც შეგვხვდა“.
დაკავების დეტალებზე აჭარის საზოგადოებრივი მაუწყებლის ეთერში რამაზ ხიმშიაშვილმაც ისაუბრა.
„არაპროფესიონალი თანამშრომლები არიან საპატრულო სამსახურში, მეათედ მაჯარიმებდნენ ერთი კვირის განმავლობაში და თხოვნით მივმართე, რომ დაბალი ჯარიმა მაინც გამოეწერათ, რადგან ფინანსურად არ მაქვს კარგი მდგომარეობა და ისედაც ვერ ვიხდი მოგროვებულ ჯარიმებს მეთქი. ხალვაშმა, ერთმა პატრულმა მითხრა, რომ ახალი უფროსი გვყავს გორიდანო და დღეს დავალებული გვაქვს ათი ადამიანი უნდა დავაკავოთო. თქვენ ჩვენ შეგვაგინეთო. მე ვუთხარი, ჩვენი ლაპარაკი ხომ იწერება და თუ შეგაგინეთ, პასუხს ვაგებთ მაგაზე-მეთქი.
გადამიგრიხა ხელები, ოთხი საათის განმავლობაში ხელბორკილებით უკანა სავარძელზე ვიყავი, ოქმის შემდგენი არავინ არ ჰყავდათ და ურეკავდნენ გარეთ და ოთხი საათის განმავლობაში არც ჰაერი მასუნთქინეს, არც წყალი დამალევინეს და როგორც საკანში ისე ვიყავი ჩაკეტილი, შემდეგ როგორც იქნა შეადგინეს ოქმი და გადამიყვანეს სრულიად უკანონოდ, იმის გამო, რომ გორელ ახალ უფროსს, ჰქონდა დავალება მიცემული ათი ადამიანის დაპატიმრების და „პალაჟენიის“ მოყვანა უნდოდათ“.
