მთავარი,სიახლეები • •

„ეს ნაბიჯი მეზობელი ავტოკრატიების მკაცრ მეთოდებსაც კი სცდება“ – აშშ-ის ყოფილი ელჩი პარტიების აკრძალვაზე

28.10.2026
„ეს ნაბიჯი მეზობელი ავტოკრატიების მკაცრ მეთოდებსაც კი სცდება“ – აშშ-ის ყოფილი ელჩი პარტიების აკრძალვაზე

ავტორი: ანა კალანდაძე, ვაშინგტონი

____

ამ კვირაში საქართველოს საკონსტიტუციო სასამართლომ მმართველი პარტიის სარჩელის განხილვა განაგრძო, რათა მთავარი ოპოზიციური პარტიები უკანონოდ გამოაცხადოს. საქართველოში აშშ-ის ყოფილი ელჩი იან კელი „ქართული ოცნების“ ამ ნაბიჯს უწოდებს „მრავალწლიანი ძალისხმევის კულმინაციას“ ქვეყანაში ერთპარტიული რეჟიმის ჩამოსაყალიბებლად.

კელის აზრით, სარჩელის სასტიკი შინაარსიც უპრეცედენტო შეტევაა ქვეყნის დემოკრატიულ არქიტექტურაზე, რადგან მთავარი ოპოზიციონერი კონკურენტების უკანონოდ გამოცხადება გამანადგურებელ დარტყმას მიაყენებს პლურალიზმის საფუძვლებს, რაც ელჩ კელის აზრით, გარდაუვალ გეოპოლიტიკურ კოლაფსს გამოიწვევს:

„ოპოზიციური ხმების მრავალფეროვნების გარეშე საქართველო ვეღარასოდეს გახდება ევროკავშირის ან ნატოს წევრი. ის გარიყულ ქვეყნად გადაიქცევა, თუ უკვე არ გადაიქცა“.

კელის აზრით, მკვეთრი საკანონმდებლო იერიშით ხელისუფლება ქვეყნის შიგნით ძალაუფლების განმტკიცებას ცდილობს. მისი სტრატეგიული მოტივაციის ანალიზი აჩვენებს, რომ „რეჟიმის ამოცანაა ძალაუფლების კონსოლიდაცია იმ დროს, როდესაც ქვეყანა ისედაც რკინის ხელით უჭირავს“.

ძალაუფლების ამგვარი მიტაცება საქართველოსა და მისი ხალხის ევროპული მისწრაფების ღალატია, მისწრაფებისა, რომლისთვისაც ხალხმა ბევრი გაიღო და არაერთგზის დაადასტურა არჩევანი, ევლო დემოკრატიის გზით დასავლეთისკენ. „გამაოგნებელია, რომ მმართველი პარტია ასე ხელაღებით ღალატობს საქართველოს ევროპულ მისწრაფებას და უგულებელყოფს უმრავლესობის ნებას“, – ამბობს იან კელი.

ამ ნაბიჯს საქართველო თანამედროვე დემოკრატიული ნორმების ჩარჩოებიდან გაჰყავს. საერთაშორისო პრეცედენტებზე საუბრისას, კელი მთავრობის ტაქტიკის სისასტიკეზე ამახვილებს ყურადღებას და ამბობს, რომ არ იცნობს სხვა დასავლურ სახელმწიფოს, „რომელსაც ამგვარი ყოვლისმომცველი აკრძალვა ეცადოს“.

მეტიც, ეს ნაბიჯი მეზობელი ავტოკრატიების მკაცრ მეთოდებსაც კი სცდება: „კრემლიც კი უპირატესობას ანიჭებს ოპოზიციური პარტიების მიმხრობას, ან არჩევნებში მათ არ დაშვებას, მათი აკრძალვის ნაცვლად“.

მიუხედავად იმისა, რომ რეჟიმი დემოკრატიის განადგურებას სასამართლოს გზით ცდილობს, კელის აზრით, შეუძლებელია ქვეყნის ნამდვილი ტრაექტორიის წაშლა ერთი განჩინებით. „მჯერა და ვენდობი ქართველების სიძლიერესა და სიმტკიცეს, რომელთაც კვლავ სჯერათ, რომ მომავალი დასავლურ ოჯახშია“, – ამბობს იან კელი.

___

22 ოქტომბერს საქართველოს საკონსტიტუციო სასამართლომ დაიწყო „ქართული ოცნების“ 88 დეპუტატის სარჩელის განხილვა, რომლითაც 5 ოპოზიციური პარტიის გაუქმებას ითხოვენ.
„ოცნება“ შემდეგი პოლიტიკური პარტიების აკრძალვას ითხოვს: „ერთიანობა – ნაციონალური მოძრაობა“, „კოალიცია ცვლილებისთვის გვარამია, მელია, გირჩი, დროა“, „ძლიერი საქართველო – ლელო, ხალხისთვის, თავისუფლებისთვის!“, „ფედერალისტური პარტია“, „გახარია საქართველოსთვის“.
განხილვა დღეს, 28 ოქტომბერს, 11 საათზე განახლდა.

გადაბეჭდვის წესი

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ. ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას. დღეს შენი მხარდაჭერა გვჭირდება _ ამისთვის შევქმენით მარტივი და უსაფრთხო პლატფორმა: შეგიძლია აირჩიო შენთვის მისაღები თანხა, რომლის გადახდასაც შეძლებ, თუნდაც თვეში 1 ლარი, და გახდე „ბათუმელებისა“ და „ნეტგაზეთის“ მხარდამჭერი. ჩვენ არ გვინდა დამატებით ფინანსურ ტვირთად ვიქცეთ ვინმესთვის. ჩვენთვის საზოგადოების მხარდაჭერა არა თანხის ოდენობით, არამედ ჩვენი მკითხველისა და გულშემატკივრის სიმრავლით იზომება.
უფრო მეტ ინფორმაციას, ასევე, წესებსა და პირობებს შეგიძლია გაეცნო მხარდაჭერის პლატფორმაზე.

ასევე: