აკაკი ძნელაძე მინისტრის მოადგილის თანამდებობიდან გაუშვეს

აჭარის არალეგიტიმური განათლების მინისტრის მოადგილე აკაკი ძნელაძე თანამდებობიდან გაათავისუფლეს. ინფორმაცია დღეს, 21 მაისს, „ბათუმელებს“ დაგვიდასტურეს აჭარის მთავრობაში.

„ბათუმელების“ კითხვაზე, თავად დაწერა განცხადება აკაკი ძნელაძემ თანამდებობიდან წასვლის თაობაზე თუ გადააყენეს? – „ოცნების“ მთავრობის პრესსამსახურში გვიპასუხეს, რომ დეტალებს დააზუსტებენ.

ონლაინ გამოცემა „აჭარა თაიმსი“ წერს, რომ აკაკი ძნელაძესა და კულტურის მინისტრის მოადგილეს, ლადო მგალობლიშვილს შორის ფიზიკური დაპირისპირება მოხდა და სწორედ ამას უკავშირდება აკაკი ძნელაძის თანამდებობიდან გათავისუფლება.

„ბათუმელებმა“ შესაბამისი უწყებების პრესსამსახურებს ჰკითხა, რამდენად რეალურია ფიზიკური დაპირისპირების შესახებ გავრცელებული ინფორმაცია. ამ კითხვაზე პასუხის გაცემისგან პრესსამსახურში თავი შეიკავეს.

ჯერჯერობით უცნობია, რის ნიადაგზე დაუპირისპირდნენ ერთმანეთს ფიზიკურად არალეგიტიმური მთავრობის მინისტრის მოადგილეები.

„ბათუმელების“ სატელეფონო ზარებს ლადო მგალობლიშვილმა არ უპასუხა. აკაკი ძნელაძემ კი თქვა, რომ „ახლა ვერ დაგველაპარაკებოდა“ და ტელეფონი გამორთო.