„კანდიდატის სტატუსზე ამ საკითხს არ აქვს პირდაპირი გავლენა,“ – ამბობს ბიძინა ლებანიძე, „პოლიტიკის ინსტიტუტის“ უფროსი მკვლევარი და იენის უნივერსიტეტის მეცნიერ-თანამშრომელი. მას ვკითხეთ გერმანიაში დეპორტაციის ახალ მაჩვენებელზე: 2023 წლის პირველი 6 თვის მონაცემებით, საქართველო დეპორტირებულების ნუსხაში რაოდენობით პირველ ადგილზეა.
ბიძინა ლებანიძე მიიჩნევს, რომ გერმანია 2023 წელის სექტემბერში დიდი ალბათობით მხარს დაუჭერს საქართველოსთვის უსაფრთხო ქვეყნის სტატუსის მინიჭებას, რაც გერმანიაში არალეგალურ მიგრაციას შეამცირებს.
პოლიტიკის ანალიტიკოსი ყურადღებას ამახვილებს გერმანიაში საზოგადოების მკაფიო დაკვეთაზე, როცა არალეგალური მიგრაციის შეზღუდვის მოთხოვნა მაღალია და ამ მიზეზით იზრდება მემარჯვენე, იმავდროულად ანტიდასავლური და პრორუსული პოლიტიკური პარტიის გავლენა.
„ქრისტიან-დემოკრატიულმა კავშირმა წამოაყენა საკანონმდებლო ინიციატივა, რომ საქართველოს მოლდოვასთან ერთად მიანიჭონ უსაფრთხო ქვეყნის სტატუსი. ამავდროულად სტატისტიკა აჩვენებს, რომ ძალიან მცირეა, მაგალითად, იმ ადამიანების რაოდენობა, ვინც გერმანიაში ლტოლვილის სტატუსი მოითხოვა საქართველოდან და მისი მოთხოვნა დაკმაყოფილდა.
უსაფრთხო ქვეყნის სტატუსი გაამარტივებს დეპორტაციის პროცედურას და შეამცირებს არალეგალური მიგრაციის მაჩვენებელსაც, როგორც ეს ბალკანეთის ქვეყნების შემთხვევაში მოხდა. აქამდე გერმანია თავს იკავებდა სტატუსის მინიჭებისგან იმიტომ, რომ ითვალისწინებდნენ ადამიანის უფლებების რისკებს…
„მწვანეები“ ეწინააღმდეგებიან საქართველოსთვის უსაფრთხო ქვეყნის სტატუსის მინიჭებას, რადგან საქართველოს მოქალაქეებს ლეგალურად გერმანიაში დასაქმების მეტი შესაძლებლობა მიეცემათ.
ბიძინა ლებანიძე
ზოგადად უარყოფითი მოვლენაა, როცა ევროკავშირში გაწევრიანება გინდა და ამ დროს მოსახლეობის დიდი ნაწილი ცდილობს თავი დააღწიოს თავის ქვეყანას არალეგალური გზით, თუმცა საქართველო გამონაკლისი ვერ იქნება. გერმანიიდან დეპორტირებულთა პირველ ათეულშია მოლდოვა და ბალკანეთის სხვა ქვეყნებიც.
არალეგალურ მიგრაციას ნეგატიური დინამიკა მოჰყვება ხოლმე, ამაზე წერენ გერმანული გამოცემებიც, რომ, მაგალითად, საქართველო და მოლდოვა ამ კუთხით მოწინავე ქვეყნებია, მაგრამ კონკრეტულად ქართველებს არ გამოყოფენ, არც საქართველოს ხელისუფლების მიმართ არ იგრძნობა კრიტიკული განწყობა. ასე რომ იყოს, ეს გაჟღერდებოდა მედიით და ოფიციალური არხებითაც.
შესაბამისად, მთავარია, საქართველოს ხელისუფლებამ აქტიურად ითანამშრომლოს გერმანიის მთავრობასთან მიგრაციის და დეპორტაციის საკითხებზე,“ – გვითხრა ბიძინა ლებანიძემ.
