ბათუმში რესტორან „რეტროს“ მფლობელი, თეიმურაზ ვარშანიძე, პოლიციამ ძალადობის მუხლით დააკავა.
სისხლის სამართლის კოდექსის 126-ე ძალადობის მუხლით პოლიციამ გამოძიება გუშინ, 4 ივნისს, დაიწყო – სოციალურ ქსელში გავრცელებული ვიდეოს საფუძველზე.
3 ივნისს ბათუმში რესტორან „რეტროს“ მფლობელმა მიმტანს სცემა. ძალადობის დამადასტურებელი კადრები „რეტროს“ ერთ-ერთმა თანამშრომელმა „ბათუმელებს“ გუშინ მოაწოდა.
ვიდეოში, რომელიც „ბათუმელებს“ რესტორნის თანამშრომელმა მოაწოდა, ჩანს, თუ როგორ კრავს ხელს რესტორნის მფლობელი მიმტანს და კარებში აგდებს. შემდეგ ისმის კივილს ხმა.
„რეტროს“ თანამშრომლის თქმით, თეიმურაზ ვარშანიძემ მიმტანის ცემა ქუჩაშიც გააგრძელა.
ბრალის დადასტურების შემთხვევაში „რეტროს“ მფლობელს დაეკისრება საზოგადოებისთვის სასარგებლო შრომა ვადით 120-დან 140 საათამდე ან შინაპატიმრობა ვადით 6 თვიდან 1 წლამდე ანდა თავისუფლების აღკვეთა ვადით 1 წლამდე, იარაღთან დაკავშირებული უფლებების შეზღუდვით ან უამისოდ.
ამავე თემაზე:
რესტორან „რეტროში“ მიმტანის ცემის ფაქტზე გამოძიება დაიწყო – შსს
