სოციალურ ქსელში გავრცელებულ ვიდეოს საფუძველზე გამოძიება დაიწყო სისხლის სამართლის კოდექსის 126-ე ძალადობის მუხლით – უთხრეს „ბათუმელებს“ შს სამინისტროს პრესცენტრში რესტორნის მიმტანის ცემის საქმეზე.
გუშინ, 3 ივნისს, ბათუმში რესტორან „რეტროს“ მფლობელმა მიმტანს სცემა.
ძალადობის დამადასტურებელი კადრები „რეტროს“ ერთ-ერთმა თანამშრომელმა „ბათუმელებს“ დღეს მოაწოდა. ის კონფლიქტის თვითმხილველია.
ვიდეოში, რომელიც „ბათუმელებს“ რესტორნის თანამშრომელმა მოაწოდა, ჩანს, თუ როგორ კრავს ხელს რესტორნის მფლობელი მიმტანს და კარებში აგდებს. შემდეგ ისმის კივილს ხმა.
„რეტროს“ თანამშრომლის თქმით, თეიმურაზ ვარშანიძემ მიმტანის ცემა ქუჩაშიც გააგრძელა.
„რეტროში“ აცხადებენ, რომ კომენტარს არ აკეთებენ და ოფიციალურ განცხადებას გაავრცელებენ.
შემთხვევა გუშინ, 3 ივნისს, მოხდა.
ბრალის დადასტურების შემთხვევაში „რეტროს“ მფლობელს დაეკისრება საზოგადოებისათვის სასარგებლო შრომა ვადით 120-დან 140 საათამდე ან შინაპატიმრობა ვადით 6 თვიდან 1 წლამდე ანდა თავისუფლების აღკვეთა ვადით 1 წლამდე, იარაღთან დაკავშირებული უფლებების შეზღუდვით ან უამისოდ.
___
