სოფლის ექიმის მომსახურება საქართველოს სამედიცინო ჰოლდინგის მართვაში გადადის. ამბულატორიები და მასთან დაკავშირებული ქონებაც ჰოლდინგის ბაზაზე უნდა გადავიდეს – სიმბოლურ ფასად 1 ლარად ამ ქონებების გადაცემის მოთხოვნით მუნიციპალიტეტებს ქონების ეროვნულმა სააგენტომ მიმართა.
საქართველოს სამედიცინო ჰოლდინგი ქვეყნის მასშტაბით სახელმწიფო დაფინანსებაზე მყოფ კლინიკებსა და სამედიცინო ცენტრებს აერთიანებს, მათ შორის არის ბათუმის რესპუბლიკური საავადმყოფო.
შესაბამისი შინაარსის განკარგულების პროექტი, მაგალითად, ხელვაჩაურის მერმა საკრებულოს მომავალ სხდომაზე დასამტკიცებლად გადაუგზავნა. პროექტის მიხედვით, მერია ჰოლდინგს 8 ამბულატორიას და მასთან დაკავშირებულ ქონებას გადასცემს.
პროექტის განმარტებითი ბარათის მიხედვით, ჰოლდინგი ამბულატორიების გადაცემის შემთხვევაში მათ რეაბილიტაციის, საჭიროების შემთხვევაში კი ახალი შენობების მშენებლობას გეგმავს, თუმცა ამისთვის ჯერ სახსრები უნდა მოიძიოს.
პირველადი, გადაუდებელი ჯანდაცვის სისტემის ერთი ჰოლდინგის მართვაში გაერთიანების გადაწყვეტილებას მომსახურების ხარისხის გაუმჯობესებით ხსნიან.
ჰოლდინგს ჯაბა სირბილაძე ხელმძღვანელობს. მანამდე ის დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორი იყო.
