ბათუმის მერიამ შეაჩერა ბათუმში, გორგასლის 116 ნომერში 14-სართულიანი კორპუსის მშენებლობის ნებართვა.
„ბათუმის მუნიციპალიტეტის მერიამ შპს „გრინკო გორგასლის“ სახელზე მრავალბინიანი სახლის მშენებლობის ნებართვის მოქმედება შეაჩერა და ადმინისტრაციული წარმოება დაიწყო.
ადმინისტრაციული წარმოების პროცესში, დაინტერესებულ პირებს უფლება აქვთ წარმოადგინონ საკუთარი მოსაზრებები,“ – ეს ინფორმაცია „ბათუმელებმა“ მერიიდან მიიღო.
ბათუმში, გორგასლის 116 ნომერში, შპს „გრინკო გორგასალი“ მრავალბინიანი კორპუსის მშენებლობას გეგმავს. მოსამზადებელი სამუშაოები კომპანიას უკვე დაწყებული აქვს.
მშენებლობას ეწინააღმდეგებიან მოქალაქეები, რომელთა საცხოვრებელი ბინებიც მშენებლობის არეალში ხვდება. ვახტანგ გორგასლის ქუჩა ბათუმში, ფარნავაზ მეფის ქუჩის პარალელურად მდებარეობს. ახალი კორპუსი, რომლის აშენებაც 116 ნომერში იგეგმება, ბინებს ჩაუბნელებს ფარნავაზ მეფის #113/121-ში მცხოვრებ იმ ოჯახებს, რომელთა აივნებიც გორგასლის ქუჩაზე გადიოდა.
დოკუმენტების მიხედვით, კომპანია გორგასლის #119-ში მშენებლობის ნებართვის მოპოვებას 2019 წლიდან ცდილობს. თავდაპირველად „გრინკო გორგასალმა“ მერიას ხუთსართულიანი კორპუსის პროექტით მიმართა, შემდეგ კი პროექტში ცვლილება მოითხოვა და ის ჯერ 12 სართულამდე, შემდეგ კი 14 სართულამდე გაზარდა. პროექტი ბათუმის ყოფილმა მერმა ლაშა კომახიძემ შეითანხმა, საბოლოო ნებართვას კი მოქმედმა მერმა, არჩილ ჩიქოვანმა მოაწერა ხელი.
14 სართული 501 კვ.მეტრზე და კედელი ფანჯრებთან – აქ მცხოვრებლები რიჟვაძის ჩარევას ითხოვენ
