აჭარის ჯანდაცვის სამინისტროს ინფორმაციით, აჭარის მდინარეების აუზებში ტყვიის შესაძლო წყაროებს იკვლევენ. წყლის სინჯები შემდგომი კვლევისათვის აღებულია მაღალმთიანი აჭარის სხვადასხვა სოფელში. კვლევის მიზანია დაადგინოს ორსულ ქალებსა და ბავშვებში ტყვიით დაბინძურების წყარო. შედეგები რამდენიმე კვირაში იქნება ცნობილი.
კვლევა ისრაელის საელჩოსა და გაეროს ბავშვთა ფონდის ორგანიზებით ხორციელდება.
პროექტის ფარგლებში ისრაელიდან საქართველოში ჩამოვიდა და იმყოფება ცნობილი ჰიდროგეოლოგი, პროფესორი, ეილონ ადარი.
გასული წლის ბოლოს აჭარაში 6 000 ორსული და ლაქტაციის პერიოდში მყოფი ქალი გამოიკვლიეს ტყვიაზე. სისხლში ტყვიის ყველაზე მაღალი შემცველობა – 25 მიკროგრამი დეცილიტრი ტყვია გამოუვლინდა 62 (3%) ბენეფიციარს.
სამინისტროს ცნობით, განმეორებით კვლევა ჩაუტარდა 784 ბენეფიციარს, ხოლო მესამე – 116-ს.
სისხლში ტყვიის შემცველობის განსაზღვრის პროგრამით 2022 წლიდან 8 წლამდე ასაკის ბავშვებიც ისარგებლებენ. როგორც აჭარის საზოგადოებრივი ჯანდაცვის ცენტრში გვითხრეს, წელს ტყვიაზე კვლევის პროგრამა გაფართოვდება. პროგრამის ბიუჯეტი აჭარაში მილიონ-ნახევარი ლარია.
ცენტრის ინფორმაციით, კვლევა ჩაუტარდებათ საპროგნოზოდ ორსულსა და ლაქტაციის პერიოდში მყოფ ქალებს (4500 ბენეფიციარი). საჭიროების შემთხვევაში ჩაუტარდებათ განმეორებითი კვლევებიც.
„ამასთან ერთად კვლევა ჩაუტარდებათ პირველადი ჯანდაცვის ქსელიდან რეფერირებულ 8-14 წლამდე ასაკის ბავშვებს ( 3800 ბენეფიციარი), რომელთაც საჭიროების შემთხვევაში მათ ასევე ჩაუტარდებათ განმეორებითი კვლევები,“ – გვითხრეს ცენტრში.
