„ქალაქის შუაგულში 7, მაღალსართულიანი, ყაზარმული ტიპის კორპუსი უკანონოდ შენდება ისე, რომ არჩილ ჩიქოვანმა თითქოს არაფერი იცის,“ – აცხადებს ოპოზიციური ერთობის მერობის კანდიდატი ბათუმში გიორგი კირთაძე. მან დღეს, 15 სექტემბერს, გოგოლის ქუჩაზე ბრიფინგი გამართა და მუნიციპალური ინსპექციის წარმომადგენლებს, ასევე პოლიციას ელოდება.
„ინსპექცია ახლა აპირებს ადგილზე მოსვლას. დაგვიდასტურეს, რომ ნებართვა გაცემული არ არის… ისე აშენდა ამდენი კორპუსი, მერიამ ვერაფერი გაიგო.
ეს არის გაურკვეველი ტიპის ნაგებობები და უცნობია, მშენებელი აქ რის გაკეთებას გეგმავს, აივნებიც კი არ აქვს ნაგებობებს…
ვინ იქნება ეს გალიფა , ჩინური ჯგუფი, რომელიც არის შემოსული, არ ვიცით. 2011 წელს აქ გაიცა ნებართვა იმაზე, რომ ავტოსადგურის გვერდით უნდა აშენებულიყო სავაჭრო ცენტრი, მაგრამ აქ შენდება ყაზარმები,“ – ამბობს გიორგი კირთაძე.
ბათუმის მუნიციპალურ ინსპექციაში „ბათუმელებს“ დაუდასტურეს, რომ მშენებლობა უკანონოა და მშენებლობის შეჩერებაზე დადგენილება გამოსცეს. ინსპექციის პრესცენტრში ამ ეტაპზე ვერ გვითხრეს, როდის დააჯარიმეს მშენებელი და რა ღონისძიებას მიმართეს, როცა რეალურად მშენებლობის პროცესი არ შეჩერებულა.
ინფორმაციის განახლება: ბათუმის მუნიციპალური ინსპექციის პრესცენტრის ინფორმაციით, ინსპექციამ „მეტრო ტერმინალის“ მიმართ გოგოლის #11-ში უნებართვოდ მრავალფუნქციური ობიექტის მშენებლობის სამართალწარმოება პირველ ივნისს მშენებლობის დაწყებისთანავე დაიწყო, მითითების შეუსრულებლობის გამო კი, დაჯარიმდა 6 ათასი ლარით.
„კომპანიას დაევალა მშენებლობის შეცერება და და ობიექტის პირვანდელ მდგომარეობაში მოყვანა [დემონტაჟი]. მას შემდეგ 6-ჯერ დაჯარიმდა მშენებლობის შუჩერებლობის გამო 5 ათასი ლარით. ვინაიდან დადგენილებები გასაჩივრებულია კომპანიის მიერ სასამართლოში, შესაბამისად აღსრულებაში გადაიგზავნება სასამართლოს მიერ მიღებული გადაწყვეტილების შესაბამისად,“ – აღნიშნულია ბათუმის მუნიციპალური ინსპექციის მიერ მოწდებულ ინფორმაციაში.
გიორგი კირთაძე „მეტრო ტერმინალის“ უკანონო მშენებლობაზე
