აჭარაში პედაგოგების ტესტირება კორონავირუსზე დასრულდა. როგორც აჭარის საზოგადოებრივი ჯანდაცვის ცენტრში „ბათუმელებს“ უთხრეს, ტესტირების შედეგად მთლიანობაში 11 პედაგოგს დაუდასტურდა კორონავირუსი.
ცენტრის ინფორმაციით, პაციენტებში ვირუსი ამ ეტაპზე მსუბუქი ფორმით მიმდინარეობს. პედაგოგები, რომლებსაც კოვიდი დაუდასტურდათ, მუნიციპალიტეტების სკოლებში ასწავლიან.
კითხვაზე, დაიტესტა თუ არა პედაგოგების ახლო კონტაქტები, საზოგადოებრივი ჯანდაცვის ცენტრში გვითხრეს, რომ გაიდლაინის მიხედვით, ინფიცირებული პედაგოგები იზოლაციაში არიან გადასული და ახლო კონტაქტები მხოლოდ კლინიკური ნიშნების შემთხვევაში დაიტესტებიან.
ამ დროისთვის დაახლოებით 9 ათასი პედაგოგი და სკოლის ადმინისტრაციული პერსონალია დატესტილი, ორი კვირის შემდეგ კი განმეორებითი ტესტირება დაიწყება.
დღეს, პირველ თებერვალს, აჭარაში სასწავლო პროცესი საკლასო ოთახებში განახლდა. პედაგოგების მასობრივი ტესტირებაც სწორედ ამ პროცესს უკავშირდება.
