შეზღუდვების მიუხედავად, ბათუმში მუშაობას აგრძელებს ფიტნესკლუბი „Reformerfitness“. დღეს ამ ფიტნესკლუბში მისული შრომის ინსპექტირების დეპარტამენტის თანამშრომლებსა და პოლიციელებს უთხრეს, რომ პანდემიის დროს დადგენილ შეზღუდვებს, რომელიც ფიტნესკლუბებსაც ეხება, არ ემორჩილებიან. ეს ფიტნესკლუბი ბათუმში სექტემბერში გაიხსნა და აკრძალვის მიუხედავად მუშაობის გაჩერებას არ აპირებს.
„გიცხადებთ დაუმორჩილებლობას… ასე ხომ არაა, გახარიას როდის რა მოუნდება, გვითხარით, რატომ არ უნდა ვიყოთ აქ, როცა ყველა წესს ვიცავთ,“ – მიმართავს შრომითი ინსპექციის დეპარტამენტის წარმომადგენლებს ფიტნესკლუბის მენეჯერი. მან ადგილზე შედგენილი სამართალდარღვევბის ოქმი არ დაიტოვა.
„ეს არის დაუსაბუთებელი შეზღუდვები. ჩვენ ვიცავთ წესებს, მშიერი და იმუნიტეტდაქვეითებული ხალხი უფრო საშიში არ არის? პირიქით, ეს ათასი სხვა დაავადების გავრცელებას შეუწყობს ხელს. ჩვენ ამ უაზრო შეზღუდვებს ბოლომდე გავუწევთ წინააღმდეგობას,“ – ამბობს Reformerfitness“-ის მენეჯერი, გიორგი ფუტკარაძე.
გიორგი ფუტკარაძე მისთვის დაკისრებული ჯარიმის – 10 ათასი ლარის გადახდას არ აპირებს.
„ასევე მითხრეს, რომ თუკი მუშაობას განვაგრძობ, უკვე გამოძიება დაიწყება და სისხლის სამართლის წესით დავისჯები. მოვიდნენენ და დამიჭირონ, მე მუშაობის შეჩერებას არ ვაპირებ,“ – გვითხრა გიორგი ფუტკარაძემ.
