მარნეულის მუნიციპალიტეტის სოფელ სადახლოს მე-2 საჯარო სკოლის პედაგოგს, ნათია მანიას კორონავირუსი 14 ოქტომბერს დაუდასტურდა. პედაგოგი ამჟამად კარანტინში იმყოფება, თუმცა სკოლაში, სადაც მან გაკვეთილები ჩაატარა, სასწავლო პროცესი ამ დრომდე მიმდინარეობს.
„დილით გაკვეთილები ჩავატარე, საღამოს კი გამომივლინდა სიმპტომები. ცემინებით დამეწყო, ტემპერატურა დაიწყო 37 გრადუსი, შემდეგ 38-მდე ავიდა“, – ამბობს ნათია მანია.
მისი თქმით, აუცილებელია სკოლის პედაგოგების ტესტირება კორონავირუსზე.
„პირბადე მეკეთა, თუმცა ვვარაუდობ, რომ მეც სკოლაში გადამედო, რადგან ჩემამდე რამდენიმე პედაგოგს უკვე ჰქონდა სურდოს სიმპტომები. სამასწავლებლოში ვიყავი, ვლაპარაკობდით.
რაც შეეხება ბავშვებს, პირველ მერხზე ვინც ზის, ის ბავშვები კი არიან შედარებით ახლოს ჩემს მაგიდასთან, მაგრამ სხვებთან დისტანციურად ვიყავი“, – ამბობს პედაგოგი.
ნათია მანია სიმპტომების გამოვლენის შემდეგ დაუკავშირდა სასწრაფო დახმარების სამსახურს, „მომაკითხეს და სახლში ამიღეს ფასიანი ტესტი“.
„ბათუმელები“ სადახლოს საჯარო სკოლის დირექტორს, ადილ შარიფოვსაც ესაუბრა. მან იცის, რომ მასწავლებელს კოვიდი აქვს, თუმცა ამბობს, რომ არ იცის, როგორ უნდა იმოქმედოს.
„სიმართლე გითხრათ, მეც გამოუვალ და გაურკვეველ მდგომარეობაში ვარ. რესურსცენტრს ამის თაობაზე ვაცნობე, თუმცა ჯერჯერობით არავის უთქვამს, როგორ უნდა გავაგრძელოთ სასწავლო პროცესი, დისტანციურად თუ ჩვეულებრივ“, – ამბობს დირექტორი.
ამ დროისთვის სკოლაში სასწავლო პროცესი ჩვეულ რეჟიმში – საკლასო ოთახებში მიმდინარეობს და თვითიზოლაციაში არც კლასი გადასულა და არც მასწავლებლები.
აჭარის რეგიონის და რამდენიმე დიდი ქალაქის გარდა სასწავლო პროცესი ძირითადად სკოლაში, საკლასო ოთახებში მიმდინარეობს.
_______________________
მთავარი ფოტო: ნათია მანია/პედაგოგი
