„500 ათასი ცალი უკვე დამზადდა და გუშინ ჩავაბარეთ საქართველოს ეკონომიკის სამინისტროს. პირბადეების მომზადება გრძელდება, ჩვენ დამატებით 200 ათას პირბადეს დავამზადებთ 6 აპრილამდე,“ – გვითხრა გია ლომინაძემ, კომპანიის „აჭარა ტექსტილეს“ ფინანსურმა დირექტორმა. ამ კომპანიამ მრვალჯერადი პირბადეების დამზადება 17 მარტს დაიწყო.
ეკონომიკის სამინისტროს პრესცენტრში ამბობენ, რომ დაავადებათა კონტროლის ცენტრისა და ლუგარის ლაბორატორიის მიერ დამტკიცებული სტანდარტებით დამზადებული პირბადეების დარიგების პროცესი რამდენიმე დღის წინ დაიწყო და ახლაც გრძელდება. ქვეყნის მასშტაბით კიდევ რამდენიმე სხვა საწარმო ამზადებს პირბადეებს.
ეკონომიკის სამინისტროს ინფორმაციით, პირბადეები, პირველ რიგში, დაურიგდათ 70 წელს გადაცილებულ იმ პენსიონერებს, რომლებსაც ქრონიკული დაავადებები აწუხებთ, ასევე საპატრულო პოლიციის წარმომადგენლებს, საკარანტინო ზონების მომსახურე პერსონალს, მებაჟეებს, მუნიციპალური მომსახურების საწარმოების თანამშრომლებს, ასევე, სახელმწიფო მოხელეებს, რომლებსაც სამსახურებრივი საქმიანობიდან გამომდინარე, ყოველდღიური შეხება აქვთ საზოგადოების სხვადასხვა ჯგუფთან.
„დღეს პირბადეები დაურიგდათ 18 წლამდე მოზარდებს, რომლებსაც დიაბეტი აქვთ… არსებობს კიდევ სხვადასხვა ჯგუფი, ვისაც ეტაპობრივად დაურიგდებათ ეს პირბადე,“ – გვიპასუხეს ეკონომიკის და მდგრადი განვითარების სამინისტროს პრესცენტრში.
პირბადეებს საწარმოები უფასოდ ამზადებენ. მათ ნედლეულს სახელმწიფო აწვდის. ეკონომიკის სამინისტროს განმარტებით, დოლბანდიც სახელმწიფოს კონკრეტულმა კომპანიებმა აჩუქეს პირბადეების დასამზადებლად. აქ ამ დროისთვის ვერ მოგვაწოდეს მონაცემი, რამდენი პირბადეა ამ დროისთვის დამზადებული, რამდენი გაიცა და კიდევ რომელი ჯგუფი მიიღებს მას უფასოდ.
