ბათუმის მერია ქალაქში მიკროავტობუსების მოძრაობას აჩერებს – ამის შესახებ დღეს ბათუმის მერმა, ლაშა კომახიძემ ბრიფინგზე განაცხადა. ლაშა კომახიძემ აღნიშნა, რომ სამარშრუტო ტაქსების ჩანაცვლება მოხდება მუნიციპალური ავტობუსებით.
ქალაქში 150 ავტობუსი და 620 მიკროავტობუსი მუშაობს, ვირუსის გავრცელების პრევენციის მიზნით, 620 მიკროავტობუსი გაჩერდება და მათ საქალაქო ინსპექცია გააკონტროლებს. სამარშუტო ტაქსების მოძრაობის აკრძალვა კორონავირუსის გავრცელების პრევენციის ღონისძიებებს უკავშირდება.
ჯერჯერობით უცნობია რა ვადით გაჩერდება მიკროავტობუსები.
საქართველოს პრემიერ-მინისტრმა გიორგი გახარიამ დღეს, 17 მარტს, გამართულ ბრიფინგზე განაცხადა, რომ ქვეყანა ვირუსის შეჩერებიდან გავრცელების ეტაპზე გადადის. ამიტომ მნიშვნელოვანია მთელი ქვეყნის მასშტაბით ეფექტური, კოორდინირებული ღონისძიებების განხორციელება.
გიორგი გახარიას განცხადებით, 18 მარტიდან თბილისში დროებით აიკრძალება სამარშრუტო ტაქსები, დარჩება მუნიციპალური ავტობუსები და მეტრო.
მთავრობის გადაწყვეტილებით, ასევე იზღუდება როგორც რეგიონებში, ისე საქალაქთაშორისო სამარშრუტო ტაქსების მოძრაობა.
დღესვე ცნობილი გახდა, რომ სამარშრუტო ტაქსების გადაადგილება შეჩერდება აჭარის მუნიციპალიტეტებშიც.
_________
ფოტოზე: ლაშა კომახიძე, ბათუმის მერი
