ბათუმის შოთა რუსთაველის სახელმწიფო უნივერსიტეტი დისტანციური სწავლების ფორმატზე გადადის, ამის შესახებ უნივერსიტეტის ვებგვერდზეა აღნიშნული.
„პრემიერ-მინისტრთან არსებული უწყებათაშორისი საბჭოს ახალი რეკომენდაციისა და საქართველოს განათლების, მეცნიერების, კულტურისა და სპორტის მინისტრის განცხადების საფუძველზე, ბსუ-ში არდადეგები 1-ელ აპრილამდე გახანგრძლივდება. ბსუ-ს სტუდენტებსა და პროფესორ-მასწავლებლებს დისტანციური სწავლების ფორმატის შესახებ დეტალური ინფორმაცია (ინსტრუქცია) მიეწოდება მიმდინარე კვირის ბოლომდე,“ – ვკითხულობთ განცხადებაში.
სწავლების დისტანციური რეჟიმის დანერგვაზე ავრცელებს განცხადებას ბათუმის სახელმწიფო საზღვაო აკადემიაც.
„16 მარტიდან აკადემია აცხადებს მზაობას იმისათვის, რომ გადავიდეს სწავლების ნაწილობრივ ელექტრონულ რეჟიმზე. ორი კვირის განმავლობაში, სხვადასხვა ელექტრონული პორტალის საშუალებით, სტუდენტებს მაქსიმალურად ექნებათ წვდომა ყველა თეორიული კურსის სასწავლო მასალაზე, პრაქტიკული სასწავლო საგნების სწავლება კი განახლდება სააუდიტორიო მეცადინეობების დაწყების შემდეგ,“ – აღნიშნულია აკადემიის მიერ გამოქვეყნებულ განცხადებაში.
ბსუ-სა და საზღვაო აკადემიაში აჭარაში ყველაზე მეტი სტუდენტი სწავლობს.
