სკოლის დინამიკურ, ეთნიკურად და კულტურულად მრავალფეროვან გარემოში (სკოლა „ევრო – 2000“-ში ქართველ მოსწავლეებთან ერთად სწავლობენ სხვა ეროვნების მოსწავლეებიც) განსაკუთრებულ მნიშვნელობას იძენს ურთიერთპატივისცემის, ურთიერთგაგებისა და ურთიერთშემეცნების ჩვევები.
სკოლამ უნდა გამოუმუშაოს მოზარდს ადამიანის უფლებების დაცვისა და პიროვნების პატივისცემის უნარი. გარდა აკადემიური ცოდნისა, მას სჭირდება არაფორმალური განათლებაც.
სწორედ ამ თემებზე სასაუბროდ მოვიწვიეთ ლადო აფხაზავა- 2017 წლის მასწავლებლის ეროვნული ჯილდოს მფლობელი, მასწავლებელთა გლობალური ფორუმის ათეულის წევრი. შეხვედრის მთავარი თემა მოხალისეობა და სამოქალაქო პასუხისმგებლობის გააზრება იყო.
დღეს სკოლები დიდი გამოწვევის წინაშე დგანან. ერთი მხრივ, ფეხი უნდა აუწყონ თანამედროვე გამოწვევებს. ტექნიკურ პროგრესს, და მეორე მხრივ, უნდა აღზარდონ პატრიოტი, დამოუკიდებელი, საკუთარი შესაძლებლობლების მუდმივად განვითარების შემძლე, ინფორმირებული და ამ ინფორმაციის ადეკვატურად გამოყენების უნარის მქონე ტოლერანტი თაობა. ამ თაობას სჭირდება სიახლეები, სიახლეების ძიების პროცესში კი მოსწავლეებმა უნდა შეძლონ, შეინარჩუნონ ყველაზე მნიშვნელოვანი – ეროვნული ღირებულებები.
სკოლა ევრო 2000-ის დირექცია და პედაგოგიური კოლექტივი მოსწავლეებთან ერთად მუდმივად სიახლეების ძიების პროცესშია, ტარდება საგნობრივი კვირეულები, ხორციელდება პროექტები.
მინიმუზეუმი, რომელიც სკოლაში გაიხსნა და რომლის შექმნის იდეა ერთმანეთისგან დამოუკიდებლად გაუჩნდათ დირექციას, მასწავლებლებსა და მოსწავლეებს, რამდენიმე მიზანს ემსახურება, პირველ რიგში, საზღვარგარეთიდან ჩამოსულ სტუმრებს ერთ სივრცეში გააცნობს იმ ეროვნულ ნივთებს, არტეფაქტებს, რომლებსაც საუკუნეების განმავლობაში ქმნიდა ქართველი ხალხი.
მუზეუმში განთავსდება მოსწავლეების ხელით შექმნილი ექსპონატებიც, ისინი თავად იქნებიან გიდები და არა მარტო შეისწავლიან თითოეული მათგანის წარმოშობის ისტორიას, არამედ ამ ექსპონატებზე ზრუნვის დროს გაიაზრებენ ეროვნული ტრადიციებისა და ღირებულებების მიმართ საკუთარ პასუხისმგებლობას.
