საზოგადოებრივი მაუწყებლის აჭარის ტელევიზიისა და რადიოს დირექტორობა ათ კანდიდატს სურს. ნათია ზოიძე, გიორგი კოხრეიძე, ფირუზ ბოლქვაძე, დავით ჩხარტიშვილი, შოთა გუჯაბიძე, ლაშა ზარგინავა, შოთა გურაბანიძე, მაია მერკვილაძე, ნათია შავაძე და შოთა ზოიძე – ასე გამოიყურება კანდიდატთა სია, რომელიც აჭარის ტელევიზიამ გამოაქვეყნა.
დირექტორობის მსურველთა განაცხადების მიღება დღეს, 20 ნოემბერს დასრულდა.
აჭარის ტელევიზიისა და რადიოს დირექტორის შესარჩევი კონკურსი 18 ნოემბერს, მას შემდეგ გაგრძელდა, რაც ქუთაისის სააპელაციო სასამართლომ გადაწყვეტილება გამოაცხადა. სასამართლომ გააუქმა ბათუმის საქალაქო სასამართლოს გადაწყვეტილება, რომლითაც საზოგადოებრივი მაუწყებლის „აჭარის ტელევიზიის და რადიოს“ დირექტორის შესარჩევი კონკურსი გიორგი კოხრეიძის სარჩელის საფუძველზე იყო შეჩერებული. გოგა კოხრეიძე მიიჩნევს, რომ „აჭარის ტელევიზიის“ არჩეული დირექტორი თვითონაა.
მიუხედავად სარჩელისა, გოგა კოხრეიძე ახალ კონკურსში მაინც მონაწილეობს. „აჭარის ტელევიზიის“ დირექტორის მოვალეობის შემსრულებელმა, ნათია ზოიძემ 19 ნოემბერს სოციალურ ქსელში დაწერა, რომ „არ არის გამორიცხული, ტელევიზიის დირექტორის პოსტი კოხრეიძეს ჩააბარონ“.
აჭარის ტელევიზიის დირექტორის ხელფასი 3300 ლარია. დირექტორს სამი წლის ვადით აირჩევენ. საზოგადოებრივი მაუწყებლის აჭარის ტელევიზიისა და რადიოს დირექტორის ადგილი 19 აპრილიდანაა ვაკანტური – მრჩეველთა საბჭომ ნათია კაპანაძე თანამდებობიდან გადააყენა.
მას შემდეგ არაერთმა საერთაშორისო და ადგილობრივმა ორგანიზაციამ, მოგვიანებით კი თავად აჭარის ტელევიზიის თანამშრომლებმაც არაერთხელ განაცხადეს, რომ აჭარის ტელევიზიის სარედაქციო პოლიტიკას საფრთხე ემუქრება.
