ჰაერის დაბინძურებისა და ჯანმრთელობის შესახებ პირველი გლობალური კონფერენცია ჯანდაცვის მსოფლიო ორგანიზაციის [WHO] ცენტრალურ ოფისში, ჟენევაში ჩატარდება. კონფერენცია 30 ოქტომბერს დაიწყება და პირველ ნოემბრამდე გაგრძელდება.
ჰაერის დაბინძურება მსოფლიოში სიკვდილიანობის ერთ-ერთ სერიოზულ პრობლემად მიიჩნევა, რომლისგანაც WHO-ს მონაცემებით, ყოველწლიურად 7 მილიონი ადამიანი კვდება. ქალაქების უმეტესობაში დაბინძურების მაჩვენებელი ატმოსფერული ჰაერისა ჯანმოს მიერ რეკომენდებულ ნორმას აჭარბებს. ჯანმო იუწყება, რომ ინსულტით, ფილტვის კიბოთი და გულის დაავადებებით გარდაცვალების შემთხვევების ერთი მესამედი ჰაერის დაბინძურებით არის განპირობებული.
საქართველოში ატმოსფერული ჰაერის ხარისხს გარემოს ეროვნული სააგენტო ავტომატური სადგურების საშუალებით უწევს მონიტორინგს. ბოლო მონაცემებით თბილისში, ბათუმსა და ქუთაისში რვა დამაბინძურებელი ნივთიერების კონცენტრაციები გაიზომა. გაზომვების შედეგად ატმოსფერულ ჰაერში განსაზღვრული ნივთიერებების შემცველობები ნორმის ფარგლებში დაფიქსირდა, გარდა აზოტის დიოქსიდისა (NO2) და მყარი ნაწილაკების (PM10) კონცენტრაციებისა. ჰაერში აზოტის დიოქსიდის კონცენტრაციის მატება, გარემოს ეროვნული სააგენტოს ინფორმაციით, არასრული წვის შედეგად არის გამოწვეული.
მსოფლიო მასშტაბით 9 გარდაცვალებიდან ერთის მიზეზი ჰაერის დაბინძურებაა.
მსოფლიო მოსახლეობის 91% ცხოვრობს ისეთ ადგილებში, სადაც ჰაერის ხარისხი ჯანმოს მიერ დადგენილ ნორმას ვერ აკმაყოფილებს.
ყოველ წელს გარდაცვალების 4,2 მილიონი შემთხვევა დაკავშირებულია გარემოს (გარეთ) დაბინძურებულ ჰაერთან, ყოველწლიურად გარდაცვალების 3.8 მილიონი შემთხვევა კი სახლში, ბინძური ქურის გამონაბოლქვს და საწვავს უკავშირდება.
გარემოს ფაქტორები, ისეთი, როგორიცაა: ჰაერის დაბინძურება, თამბაქოს მეორადი კვამლი (პასიური მწეველობა) შენობებში და ანტისანიტარია, მიზეზი ხდება ყოველწლიურად 5 წლამდე ასაკის 1.7 მილიონი ბავშვის გარდაცვალებისა, რაც ბავშვების გარდაცვალების შემთხვევების 26%-ია.
ხუთ წელზე მეტი ასაკის ბავშვების 11-14%-ს, მსოფლიო მასშტაბით, ასთმის სიმპტომები აღენიშნება. ამ სიმპტომების უმეტესობა დაკავშირებულია ჰაერის დაბინძურებასთან, თამბაქოს მეორად კვამლთან, მტვერთან და ნესტთან.
ჰაერის დაბინძურებისა და თამბაქოს მეორადი კვამლის გამო ყოველწლიურად 5 წლამდე ასაკის 570 000 ბავშვზე მეტი კვდება რესპირატორული დაავადებებისგან.
მაშინ, როცა ბევრი რამ ბავშვებში კიბოს წარმოშობის მიზეზებზე უცნობია, გარემო ფაქტორები, ისეთი, როგორიცაა: მზისა და იონიზირებელი გამოსხივება, თამბაქოს მეორადი კვამლი, აფლატოქსინები და ზოგიერტი პესტიციდები, ხელს უწყობენ ბავშვობაში კიბოს განვითარებას და აგრძელებენ კიბოს განვითარებაზე ზემოქმედებას მომავალშიც.
