აჭარის ჯანდაცვის სამინისტრომ აჭარის სოფლებში მდებარე სამედიცინო ცენტრები რუსული წარმოების „ნივებით“ აღჭურვა. სამინისტრომ სოფლად პირველადი ჯანდაცვის განვითარების ხელშეწყობის პროგრამის ფარგლებში 2014 წლიდან დღემდე 51 პჯდ ცენტრს გადასცა ავტომანქანა „ნივა“.
რატომ შეაჩერა არჩევანი აჭარის ჯანდაცვის სამინისტრომ რუსული წარმოების ავტომობილზე? აჭარის ჯანდაცვის მინისტრის პირველი მოადგილე, რუსუდან შავიშვილი ამბობს, რომ გადამწყვეტი გეოგრაფიული არეალი იყო – აჭარის მაღალმთიანეთში მაღალი გამავლობის ავტომანქანებია საჭირო:
„ეს პროცესი დაიწყო 2014 წელს, მაშინ გაეროს მოსახლეობის ფონდმა წამოაყენა წინადადება, რომ აჭარაში არსებული 56 პჯდ ცენტრისთვის ეტაპობრივად შეგვეძინა მანქანები. შესწავლილი იქნა საჭიროებები და გეოგრაფიული სიტუაცია, გაეროს ფონდი შემოვიდა საკმაოდ დიდი დაფინანსებით, აჭარის ჯანდაცვის სამინისტრო -თანადაფინანსებით. გაერომ წარმოადგინა ტექნიკური კრიტერიუმები, რომლებიც უნდა დაეკმაყოფილებინა მომწოდებელს, ტენდერში არ ყოფილა მითითებული [მარკა], ტენდერი იყო ღია, ყველას შეეძლო მონაწილეობა. ტენდერში გაიმარჯვა „ნივას“ მომწოდებელმა და სრულად დააკმაყოფილა ტენდერის მოთხოვნები. 2014 წელს, პირველ ეტაპზე, შეძენილი იქნა 21 ასეთი მანქანა. 2016 წელს, უკვე მხოლოდ აჭარის ჯანდაცვის სამინისტრომ, გაეროს ფონდის გარეშე გააგრძელა პროგრამა და წელს დავასრულეთ.”
წელს ტენდერი 8 ავტომობილის შესაძენად სამინისტრომ 200 ათას ლარზე გამოაცხადა. ტენდერში ერთადერთმა მონაწილემ, „გლობალ მოტორს ჯორჯია ჯი ემ ჯიმ“, გაიმარჯვა, რომელმაც სამინისტროს 196 ათას ლარად შესთავაზა ავტომობილების შეძენა. ეს კომპანია საქართველოში რუსული და ჩინური წარმოების ავტოტექნიკის შემომტანია. წინა წლებშიც სწორედ ეს კომპანია იყო ტენდერში გამარჯვებული.
კითხვაზე, რამდენად მიზანშეწონილია მთავრობამ რუსული წარმოების ავტომობილი შეიძინოს, მაშინ, როცა საქართველოს ნაწილი ოკუპირებულია რუსეთის მიერ, აჭარის ჯანდაცვის მინისტრის მოადგილე ამბობს:
„მწარმოებელი შეიძლება იყოს რუსული, მაგრამ კომპანია ქართულია. 2014 წელს დაიწყო შესყიდვა, მაშინაც ისეთი ურთიერთობა გვქონდა რუსეთთან, როგორც დღეს გვაქვს, მაშინ თვითონ გაეროც უარყოფდა და დაბლოკავდა ამ თემას. ეს იყო ერთობლივი პროექტი. შედეგი უფრო მნიშვნელოვანია, ხელმისაწვდომობა არის ძალიან დიდი ფუფუნება. მოგეხსენებათ, რა ძნელია მიაღწიო, მიხვიდე პაციენტამდე მაღალმთიან სოფლებში.
ტენდერში მონაწილეობა მიიღო კომპანიამ, რომელმაც წარმოადგინა მანქანა, რომელიც ხარჯთეფექტურიც არის, გამავლობაც მაღალი აქვს. მოგეხსენებათ, ასეთ გზებზე არის იმის ალბათობა, რომ დასჭირდება შეკეთება და ამ სერვისების ხელმისაწვდომობა იქნებოდა უფრო იოლი.“
„ნივა“ საქართველოში პოპულარული ავტომობილი რომ არ არის, ამას შინაგან საქმეთა სამინისტროს ანალიტიკური დეპარტამენტის მიერ მომზადებული ავტოპარკის მიმოხილვაც მოწმობს, სადაც საქართველოში გავრცელებული ავტომანქანების ბრენდების ათეულში „ნივა“ არ შედის.
უშუალოდ აჭარის ჯანდაცვის სამინისტროს 7 ავტომანქანა აქვს, მათ შორის ერთი „ნივაა“.
