რატომ ხმება მანდარინის ნერგები ჩაქვის საცდელ პლანტაციაში

ჩაქვის საცდელ პლანტაციაში, „აგროსერვის ცენტრის“ ტერიტორიაზე მანდარინის ნერგები ხმება. ეს პლანტაცია აჭარის სოფლის მეურნეობის სამინისტროს სპეციალურად მანდარინის საადრეო ჯიშების გასახარებლად აქვს გაშენებული.

„ეს ნერგები გამხმარი არ არის, შეიძლება გადარჩეს,“ – ირწმუნება გოჩა ბერიძე, ააიპ „აგროსერვის ცენტრის“ ხელმძღვანელი. მისივე მტკიცებით, პლანტაციაში, სადაც 10 ათასი ნერგია, მხოლოდ ათს შეექმნა პრობლემა. თუმცა, ჩვენ მიერ დაახლოებით ერთი თვის წინ გადაღებულ ფოტოზე, პლანტაციის მხოლოდ ერთ ნაწილში გაცილებით მეტი, 30-მდე გამხმარი ნერგი ჩანს.

გოჩა ბერიძე განმარტავს, რომ მეცნიერები დაკვირვებას თითოეულ ნერგზე განაგრძობენ და დეტალური ინფორმაცია 15 მაისის შემდეგ გახდება ცნობილი. „წინასწარი ვარაუდით, დარგვის დროს საადრეო ჯიშის ნერგებს შეერია სხვა ნერგები, რომლებიც ყინვაგამძლე არ არის. გვერდით არის სხვა, გახარებული ნერგებიც. ჩვენ სამი წელი ვაკვირდებით ამ პროცესს. ზოგადად მეცნიერულ დაკვირვებას, რომელი ნერგი შეიძლება იყოს სამრეწველო მიზნით გამოყენებული, 5-6 წელი სჭირდება,“- გვითხრა გოჩა ბერიძემ.

ვინ აგებს პასუხს, თუკი არასწორად დაირგო მანდარინის ნერგები? – „აგროსერვის ცენტრის“ დირექტორმა გვითხრა, რომ პასუხს ვერავინ აგებს, რადგან „ეს მცენარეა, 100-პროცენტიან გარანტიას ვერავინ მოგცემთ თითოეული ნერგის გახარებაზე“.

გამხმარი მანდარინის ხეები ჩაქვის საცდელ პლანტაციაში / „ბათუმელების“ ფოტო

გამხმარი მანდარინის ხეები ჩაქვის საცდელ პლანტაციაში / „ბათუმელების“ ფოტო

ნეტგაზეთის მასალების სხვა გამოცემებში გადაბეჭდვის წესი


ავტორი