სახელმწიფო Airbnb-ით ბინების გაქირავებაზე გადასახადის დაწესებას აპირებს

ტურიზმის ადმინისტრაცია რეგულაციებზე იწყებს მუშაობას, რომლითაც Airbnb-ზე ბინის გაქირავების სერვისი დარეგულირდება.

„Airbnb-ი გახდა ძალიან ბევრი სასტუმროს კონკურენტი და შეაწუხა სასტუმროები, უხეშად რომ ვთქვათ, ამ სიტუაციამ. ამ მიმართულებით იგეგმება ის, რომ ჩვენ ვსწავლობთ ყველაზე კარგ მაგალითს, თუ როგორ დარეგულირდა სხვა ქვეყნებში ეს. ჩვენი ამოცანაა, ერთი მხრივ, არსებულ სასტუმროებს არ შეექმნათ პრობლემა იმიტომ, რომ ვიღაცა გადასახადს არ იხდის. ეს არის ერთი მხრივ,  ბიზნესს არ შეეხოს პრობლემა, მეორე ის გადასახადი, რა თქმა უნდა, დამატებითი შემოსავალია პირდაპირ ქვეყნის ბიუჯეტში და ამის ადმინისტრირება უნდა მოხდეს,“ – განაცხადა გიორგი ჩოგოვაძემ, ტურიზმის ეროვნული ადმინისტრაციის ხელმძღვანელმა, ტვ პირველზე, საქმიან დილაში სტუმრობის დროს.

ჯერჯერობით უცნობია, თუ რა ტიპის რეგულაციები დაწესდება.

გიორგი ჩოგოვაძის ინტერვიუს ნაწყვეტი

გიორგი ჩოგოვაძის ინტერვიუს ნაწყვეტი ტვ პირველზე, საქმიან დილაში სტუმრობის დროს. ტურიზმის ეროვნული ადმინისტრაციის ხელმძღვანელი საუბრობს Airbnb-ზე ბინის გაქირავების სერვისზე

Posted by ბათუმელები • Batumelebi.ge on ხუთშაბათი, 18 ოქტომბერი, 2018

Airbnb-ი ბინების ონლაინდაჯავშნის პლატფორმაა, რომლითაც საქართველოში ათასობით ადამიანი სარგებლობს.  Airbnb-ის საშუალებით საქართველოში მცირე მეწარმეები ბინებს აქირავებენ. ხშირად ბინის გაქირავება ოჯახების ერთადერთი შემოსავალია.

საქართველოში აქტიურად სარგებლობენ ბინების ონლაინდაჯავშნა/გაქირავების კიდევ ერთი საიტით – booking.com, თუმცა ტურიზმის ეროვნული ადმინისტრაციის ხელმძღვანელს, გიორგი ჩოგოვაძეს ეს სერვისი არ უხსენებია.

განახლება: ტურიზმის ეროვნულმა ადმინისტრაციამ ამ საკითხთან დაკავშირებით განცხადება გაავრცელა. ადმინისტრაციის განცხადებას  უცვლელად გთავაზობთ.

“სოციალურ ქსელში გავრცელებული ინფორმაცია, თითქოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაცია Airbnb-ზე რეგისტრირებულ ბინებთანდა აპარტამენტებთან დაკავშირებით რაიმე ტიპის შეზღუდვებს, ან გადასახადების შემოღებას გეგმავს, არ შეესაბამება სიმართლეს.
ტურიზმის ეროვნული ადმინისტრაციის ხელმძღვანელი გიორგი ჩოგოვაძე აცხადებს, რომ ადმინისტრაცია მზად არის, დისკუსიაში ჩაერთოს გიდების სერთიფიცირების, სასტუმროებისლიცენზირების, ასევე ნებაყოფლობითი სარეიტინგო სისტემების შესაძლო შემოღების საკითხებთან დაკავშირებით.
ტურიზმის ეროვნული ადმინისტრაცია მიესალმება, საქართველოში ჩამოსული ტურისტებისთვის რაც შეიძლება მეტი განთავსების ობიექტის არსებობას, მათ შორის აპარტამენტებისა დაბინების გაქირავების სახით – ეს საშუალებას გვაძლევს, ქვეყანამ მეტი ტურისტი მიიღოს. ჩვენ აქტიურად ვმუშაობთ ტურისტული ნაკადების ზრდის მიმართულებით, რაც სხვადასხვა დადებით ეკონომიკურ ფაქტორებთან ერთად გულისხმობს იმ მოქალაქეებისთვის დამატებით შემოსავლებს, რომლებიც ტურისტებზე ბინებს აქირავებენ.
კიდევ ერთხელ ხაზგასმით აღვნიშნავთ, რომ ინფორმაცია Airbnb-ზე რეგისტრირებულ ბინებთან და აპარტამენტებთან დაკავშირებით რაიმე ტიპის რეგულაციების შემოღების შესახებ,სიმართლეს არ შეესაბამება”.

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი