ბათუმში ქართველებზე მეტი ბინა უცხოელებმა იყიდეს – Colliers Georgia-ს თებერვლის მონაცემები

Colliers Georgia-ს მონაცემებით, 2026 წლის თებერვალში ბათუმში ახალაშენებული ბინების გაყიდვები ძირითადად უცხოელი მყიდველების ხარჯზე გაიზარდა. მათი წილი მეორეულ ბაზარზე 50%-ია.

გასული წლის თებერვალთან შედარებით უცხოელი მყიდველების რაოდენობა ახალაშენებული ბინების პირველად ბაზარზე 53.9%-ით, ხოლო მეორეულ ბაზარზე 47.6%-ით გაიზარდა.

2026 წლის თებერვალში ბათუმში საცხოვრებელი ბინების ტრანზაქციების რაოდენობა გასული წლის თებერვალთან შედარებით 19.7%-ით გაიზარდა და 1 315 ერთეულია, ბაზრის ზომა კი 33.1%-ით 82 მილიონ აშშ დოლარამდე გაიზარდა.

გაყიდვების რაოდენობაში უცხოელი მოქალაქეების წილმა გადაუსწრო, ქართველი მოქალაქეების წილს, როგორც პირველად, ისე მეორეულ ბაზრებზე.

Colliers Georgia-ს ინფორმაციით, ბათუმში 2026 წლის თებერვალში ახალაშენებული ბინების საშუალო შეწონილი ფასი გასული წლის თებერვალთან შედარებით 12.6%-ით გაიზარდა და კვ.მ-ზე 1 334 აშშ დოლარია.

პირველად ბაზარზე მაჩვენებელი 23.2%-ით გაიზარდა, ხოლო მეორეულ ბაზარზე 6.9%-იანი ზრდა დაფიქსირდა.

Colliers Georgia წერს ასევე, რომ პირველად ბაზარზე ტრანზაქციების ნაწილი გვიან რეგისტრირდება, რის გამოც ფასების ზრდის ტრენდი არ ასახავს რეალობას.

ბათუმში 2026 წლის თებერვალში ახალაშენებული ბინების გაყიდვების რაოდენობა 2025 წლის თებერვალთან შედარებით 22.7%-ით გაიზარდა, ძველი ბინების ტრანზაქციები კი 12.8%-ით შემცირდა.

ტრანზაქციების რაოდენობა გაიზარდა ახალაშენებული ბინების როგორც პირველად [24.4%], ისე მეორეულ [21.4%] ბაზრებზე.