რეგიონების სახანძრო-სამაშველოებს ტყის ახალი სახანძრო მანქანები გადასცეს

საგანგებო სიტუაციების მართვის სამსახურის რეგიონების სახანძრო-სამაშველო ძალების წარმომადგენლებს ტყის ახალი სახანძრო მანქანები გადაეცათ. ახალი მანქანები 13 რეგიონის ავტოპარკს შეავსებს.

ახალი სახანძრო მანქანა აჭარაში ჯერჯერობით მხოლოდ ხულოს გადაეცა. დანარჩენი 12 მანქანა გადაეცა აბასთუმანს, ბორჯომს, ახმეტას, თელავს, თეთრიწყაროს, დუშეთს, კასპს, ხარაგაულს, ლენტეხს, ონს, მესტიასა და ჩოხატაურს.

უახლოეს მომავალში საქართველოში დამატებით 7 ახალი ტყის სახანძრო მანქანა შემოვა, სწორედ მაშინ იგეგმება მანქანების გადაცემა ქედასა და შუახევზე.  დანარჩენი ხუთი მანქანა კი დმანისს, თიანეთს, ხაშურს, ადიგენს და ბაკურიანს გადაეცემა.

ახალი სახანძრო მანქანები საგანგებო სიტუაციების მართვის სამსახურმა ტენდერით მიმდინარე წლის ზაფხულში შეიძინა. მათი საერთო ღირებულება 10 მილიონი ლარია.

ახალი სახანძრო მანქანის უპირატესობა რთულ რელიეფურ პირობებში გადაადგილებაა, რაც მნიშვნელოვნად ამცირებს ტყის ხანძრების რისკს. ახალი სახანძრო მანქანების მეშვეობით უკვე რამდენჯერმე მოხდა ტყის ხანძრების ლიკვიდაცია და აღიკვეთა მისი ფართო მასშტაბზე გავრცელება.

საგანგებო სიტუაციების მართვის სამსახურის ინფორმაციით, იგეგმება მაშველების ფორმების განახლებაც.

ამავე თემაზე:

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან