პროფესიულ სასწავლებლებში 2 700 სტუდენტი მიიღეს

2 700-ზე მეტი  აპლიკანტი პროფესიული სასწავლებლების სტუდენტი გახდა. შედეგები დღეს, 23 მაისს, გამოქვეყნდა.

როგორც პროფესიული განათლების დეპარტამენტის უფროსის მოადგილე თამარ სამხარაძე „ბათუმელებთან“ ამბობს, ყველაზე მოთხოვნადი პროფესიების ათეულში პირველ ადგილს ისევ კულინარია ინარჩუნებს. შემდეგ მოდის ინფორმაციული ტექნოლოგიები, ბუღალტრული აღრიცხვა, მოთხოვნადი გახდა ელექტროობაც.

მოთხოვნადი პროფესიების ათეულშია ასევე რესტორნის მენეჯმენტი და სარესტორნო საქმის წარმოება, სტილისტის პროგრამა – კერვა-დიზაინის მიმართულებით.

პროფესიულ სასწავლებლებში სტუდენტების ჩარიცხვა წელიწადში ორჯერ, გაზაფხულსა და შემოდგომაზე  მიმდინარეობს. წელს, საგაზაფხულო  მიღებაზე, განაცხადი 4 ათასამდე აპლიკანტმა გააკეთა. როგორც თამარ სამხარაძე ამბობს, აპლიკანტების რაოდენობა საშემოდგომო მიღებაზე ორმაგდება.

სამინისტროს ინფორმაციით, პროფესიული განათლებით  დასაქმების მაჩვენებელი სტაბილურად იზრდება.

2013  წლის კვლევის მიხედვით, 38 პროცენტი იყო დასაქმების ზრდა, 2017 წლის კვლევით კი 56  პროცენტით გაიზარდა დასაქმებულთა რაოდენობა.

„კვლევის დროს იყო დასმული შეკითხვა იმაზე, თუ როდის დასაქმდა, სწავლის პერიოდში თუ შემდგომ, ეს 56 პროცენტი არის სწორედ ის, ვინც ამბობს, რომ სწავლის ან შემდგომ პერიოდში დასაქმდა.

დასაქმების მაჩვენებელი ყველაზე მაღალია ტურიზმის სექტორში, იმიტომ, რომ სეზონური  დასაქმებებიც ძალიან ეხმარება ამას.

ამ პერიოდში სასტუმროს, რესტორნების მომსახურებაში გაზრდილია დასაქმების მაჩვენებელი, ვიდრე სხვა პროფესიებზე,“-ამბობს თამარ სამხარაძე.

მისი თქმით, წელს პროფესიულ განათლებას ახალი მიმართულებებიც დაემატა, „ათასწლეულის გამოწვევის ფონდის“ მხარდაჭერით დაემატა დუალური პროგრამები, საინჟინრო, სოფლის მეურნეობისა და სამშენებლო მიმართულებები.

„ბევრ ამ მიმართულებაში  ქართულის გარდა  გაიცემა საერთაშორისო სერტიფიკატიც, რაც ასევე მიმზიდველს ხდის ამ პროგრამებს“.

საქართველოს პარლამენტში შესულია ახალი კანონპროექტი პროფესიული განათლების შესახებ, რისი მიღების შემდეგაც პროფესიული  სასწავლებლის სტუდენტს უფლება ექნება, მიიღოს საშუალო სკოლის ატესტატი, „რაც ასევე  გაზრდის პროფესიული განათლების მიღების მსურველთა რაოდენობას,“-ამბობს სამხარაძე.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com