რომელი დაავადებებისთვისაა სასარგებლო ზღვაში ცურვა

როგორც ექიმები ამბობენ, ზღვაში ცურვას ხასიათის გაუმჯობესების გარდა დადებითი ზეგავლენა შეუძლია იქონიოს თქვენს ჯანმრთელობაზეც. სხვა დადებით თვისებებთან ერთად, ზღვის წყალში ცურვას შეუძლია გაამაგროს იმუნური სისტემა, გააუმჯობესოს სისხლის მიმოქცევა, დაატენიანოს კანი და ა.შ.

ექიმი-ნევროლოგი მიხეილ მჟავანაძე ამბობს, რომ ცურვა მკურნალობისა და პრევენციის ერთ-ერთი საუკეთესო გზაა ზურგისა და კისრის ოსტეოქონდროზის შემთხვევაში:

„ცურვის დროს მოძრაობაშია ყველა კუნთი და სახსარი, ამიტომაც იგი აქტიურად ეხმარება ოსტეოქონდროზის პრევენციას. განვითარებულ ოსტეოქონდროზის შემთხვევაში ტკივილის რისკს ამცირებს, უკვე განვითარებული ტკივილის სინდრომის დროს კი, ამ პრობლემის კუპირებას ახდენს.

მართალია, მიიჩნევა, რომ ზღვის წყალი უფრო მარგებელია, ვიდრე უბრალოდ აუზისა, მაგრამ მე მაინც ვიტყვი, რომ ზღვა ამ შემთხვევაში განსაკუთრებული თვისებებით არ გამოირჩევა, აქ მთავარი ცურვაა,” – ამბობს ექიმი.

მიხეილ მჟავანაძე ამბობს, რომ ოსტეოქონდროზის სხვადასხვა ფორმის დროს დიდი მნიშვნელობა აქვს ცურვის მეთოდს: „როცა ამას აუზში აკეთებ, იქ მეთოდისტია, რომელიც ასწავლის, რომელი ცურვა რა დროს უნდა გამოიყენოს ადამიანმა, რომ ადვილად მოიხსნას ესა თუ ის ტკივილი და არ განვითარდეს ოსტეოქოდროზი”.

ექიმი ამბობს, რომ ცურვის უნივერსალურ მეთოდად მიიჩნევა ბრასი – ცურვა ხელის ზემოდან მოსმით, „ამ დროს ყველა კუნთი მუშაობს. ძალიან კარგი იქნება, ყველამ რომ იცუროს. ზღვისპირა ქალაქში ვცხოვრობთ და ჩვენი მოსახლეობის დაახლოებით 30% ზღვაზე ერთხელაც კი არ გადის მთელი წლის განმავლობაში” – ამბობს ის.

ენდოკრინოლოგ მედეა ამაშუკელის თქმით, ზღვაზე დასვენება იმუნიტეტს აძლიერებსკერძოდ კი, მზეზე ყოფნისას ადამიანები იღებენ D ვიტამინს, რომლის დეფიციტიც, ექიმის თქმით, ხშირად აღენიშნებათ ადამიანებს:

„ზღვა რომ შეიცავდეს რაიმე განსაკუთრებული რაოდენობის იოდს, რომელიც ფარისებრ ჯირკვალზე რაიმე ზეგავლენას მოახდენს – ასეთი კავშირი არ არის, მაგრამ ზღვაზე ყოფნის პერიოდში ორგანიზმი საკმარისი რაოდენობით იღებს D ვიტამინს, ამ ფონზე ხდება იმუნიტეტის გაძლიერება, ფარისებრი  ჯირკვლის ნორმალური მუშაობა. ხდება ფარისებრი ჯირკვლისა და ზოგადად, იმუნური, ენდოკრინული დაავადებების პრევენცია.

აუცილებელია ზომიერების დაცვა. უმჯობესია D ვიტამინი მივიღოთ დილის და საღამოს პერიოდში, რადგანაც კანის დამწვრობა კანის კიბოს რისკთან არის დაკავშირებული”.

მედეა ამაშუკელი ამბობს, რომ უნდა მოვერიდოთ შუადღის მზეს, სასურველია ზღვაზე გასვლა 9-დან 11 საათამდე და საღამოს 7 საათის შემდეგ.

კიდევ ერთი ჯანმრთელობასთან დაკავშირებული პრობლემა, რასაც ზღვა ეხმარება – ვენების დაავადება და სისხლის მიმოქცევაა.

მაგალითად, ვარიკოზის ანუ ვენების ვარიკოზული გაგანიერებისას ხდება ქვედა კიდურის ზედაპირული ვენების (რომელთაც სისხლი მიაქვთ გულისკენ) სარქვლოვანი აპარატის დარღვევა, რის გამოც ხდება სისხლის უკუდინება. ამ დროს თხელდება ვენის კედელი და ვენა ხდება ტომარისებური აღნაგობის, ალაგ-ალაგ შეიმჩნევა ვარიკოზული კვანძების გამობერვა. ვარიკოზი შესაძლოა წელიწადის ნებისმიერ დროს განვითარდეს, მაგრამ ზაფხულის სიცხის გამო იგი სწორედ ზაფხულში მწვავდება.

ანგიოლოგი სოსო მარგალიტაძე ამბობს, რომ ზღვაში ცურვა სწორედ ვენების სარქვლოვან აპარატს ამაგრებს, რაც ხელს უწყობს სისხლის ნორმალურ მოძრაობას ქვემო კიდურების ვენურ სისტემაში. ექიმი ხშირად ცურვას გვირჩევს: „ვინც ცურვა არ იცის, უბრალოდ გაიაროს წყალში“. აქვე უნდა აღინიშნოს, რომ გარუჯვა და ზედმეტი სიცხე ვენების დაავადებების მქონე ადამიანისთვის საზიანოა.

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან